"অসম ৰাজ্যিক চলচ্চিত্ৰ বঁটা" অনুষ্ঠানত আন বহু কথাৰ লগতে মনলৈ আহিল-- অপূৰ্ব শৰ্মা, জাহ্নু বৰুৱা, হেমন্ত বৰ্মন উৎপল বৰপূজাৰী, বিতোপন বৰবৰা আদিকে ধৰি চিনেমা জনা লোকো আছে অসমত

মুখ্যমন্ত্ৰী হিমন্ত বিশ্ব শৰ্মাই হেনো 

অসম ৰাজ্যিক চলচ্চিত্ৰ (বিত্ত আৰু উন্নয়ন) নিগমৰ অধ্যক্ষ সীমান্ত শেখৰক  "অসম ৰাজ্যিক চলচ্চিত্ৰ বঁটা" অনুষ্ঠানটো "ডাঙৰকৈ" পাতিবলৈ পৰামৰ্শ দিছিল। "ডাঙৰকৈ"য়ে পাতিলে, সুপৰিকল্পনাৰ পৰা বহু আঁতৰত থাকি। প্ৰস্তুতিপৰ্বৰ আলোচনাৰ বাবে এবাৰ আমাকো মাতিছিল।আলোচনা মানে? আমাৰ ধাৰণাত কথাটো এনেধৰণৰ, বঁটা কেনেদৰে দিয়া হ'ব বিভাগটোৰ ফালৰ পৰা "ব্লু-প্ৰিণ্ট" সাজু কৰা হৈছিল, আমাক শুনোৱা হৈছিল মাত্ৰ! গোটেই "চৰ্চা"টোত মোৰ কিবা গুৰুত্ব থকা বুলি ধাৰণা নকৰিলোঁ, মোক কিয় আমন্ত্ৰণ কৰা হৈছিল-- নুবুজিলোঁ। গতিকে সেই প্ৰসংগ সিমানতে মনৰ পৰা উলিয়াই, "চৰকাৰী কাম এনে ধৰণৰে" বুলি ধৰি লৈ নিজৰ কামত মন দিছিলোঁ। পৰৱৰ্তী সময়ত "জুৰী"ৰ বাবেও আমন্ত্ৰণ কৰিছিল। খেলি মেলিৰ বাবে আঁতৰি আহিলোঁ। গতিকে ক'ব পাৰো-- খেলি মেলি প্ৰস্তুতি পৰ্বৰ পৰা কালি বঁটা প্ৰদান অনুষ্ঠানটোলৈকে। সেই দিনা আলোচনাত সীমান্ত শেখৰে কৈছিল, "ৰাজ্যিক চলচ্চিত্ৰ বঁটা"ৰ অনুষ্ঠানটো ৰাষ্ট্ৰিয় চলচ্চিত্ৰ বঁটাৰ দৰে কৰিব। সেয়েহে আমি ভাবিছিলোঁ-- যিদৰে ৰাষ্ট্ৰীয় চলচ্চিত্ৰ বঁটা ৰাষ্ট্ৰপতি বা উপ ৰাষ্ট্ৰপতিয়ে প্ৰদান কৰে, তেনেদৰে ৰাজ্যিক চলচ্চিত্ৰ বঁটাৰ মৰ্যাদা ৰাখি পুৰস্কাৰ সমূহ মাননীয় ৰাজ্যপালৰ হতুৱাই প্ৰদান কৰিব! --সীমান্ত শেখৰে আৰু কৈছিল গীত-মাতৰ কোনো অনুষ্ঠান নাথাকিব। দেখিলোঁ, বিপৰীত ছবি। ভাষনো শুনিলোঁ, ৰাজনীতিকৰ। উপস্থিত দৰ্শকৰ মুখত জুৰীয়ে "বঁটা" লোৱা চৰ্চাও শুনিলোঁ। বাহিৰত সুন্দৰকৈ সজোৱা চিনেমাৰ পোষ্টাৰৰ মাজত

ভিডিঅ' চিনেমাৰ পোষ্টাৰো দেখিলোঁ।

কালি প্ৰদান কৰা ২০১৮ আৰু ২০১৯ বৰ্ষৰ "অসম ৰাজ্যিক চলচ্চিত্ৰ বঁটা" অনুষ্ঠানত আন বহু কথাৰ লগতে মনলৈ আহিল-- অপূৰ্ব শৰ্মা, জাহ্নু বৰুৱা, হেমন্ত বৰ্মন, উৎপল বৰপূজাৰী বিতোপন বৰবৰা আদিকে ধৰি চিনেমা জনা লোকো আছে অসমত।