অসমীয়া চিনেমাৰ সমালোচনা ইত্যাদি /১

"চিনেমা চোৱা মানুহ" --লিখিছিলোঁ ২০০৩ চনত। "বিস্ময়"ত প্ৰকাশ পাইছিল। লেখাটো মোৰ "চিনেমা-চিনেমা" গ্ৰন্থত আছে।

---------------------------------------->>>

অসমীয়া দৰ্শকে কেনে ধৰণৰ অসমীয়া চিনেমা পছন্দ কৰে? --এখন চিনেমা কেন্দ্ৰীক গ্ৰন্থ উন্মোচনী অনুষ্ঠানত সাংবাদিক গৌতম শৰ্মাৰ প্ৰশ্ন। সাংবাদিক গৰাকীয়ে এই প্ৰসংগত 'চিনেমা সমালোচক' সকলে চৰ্চা কৰাৰ প্ৰয়োজন থকাৰ কথা ক'লে। প্ৰথম কথা-- চিনেমা 'আলোচক' (negotiator), চিনেমাৰ 'প্ৰচাৰক' (publicity designer), চিনেমা 'লেখক' (writer) আৰু চিনেমাৰ  'সাংবাদিক' (correspondent) আৰু চিনেমা 'সমালোচক' (critic, reviewer) একাকাৰ। কোনোকালে চিনেমাৰ সমালোচনা এটা নিলিখা চিনেমাৰ প্ৰচাৰত সহায় কৰা সংবাদদাতাকো 'চিনেমা সমালোচক'ক বুলি ধৰি লৈ বঁটা দিয়াৰ, 'চলচ্চিত্ৰ বঁটা'ৰ জুৰীৰ আসনত বহুওৱাৰ উদাহৰণো আছে। 'বঁটা'ই নিৰ্মাণ কৰা চিনেমা সমালোচকো আছে। কিন্তু এইটোৱে সত্য--  অসমত অসমীয়া চিনেমাৰ সমালোচকৰ সংখ্য তেনেই কম। অপূৰ্ব শৰ্মা, মনোজ কুমাৰ গোস্বামী, ঘন হাজৰিকা 

 বিতোপন বৰবৰা, মনোজ বৰপূজাৰী, অপৰাজিতা বৰপূজাৰীকে ধৰি কম সংখ্যকৰ পৰাহে অসমীয়া চিনেমাৰ সমালোচনা পাইছো। ইয়াৰ বিপৰীতে অসমীয়া চিনেমা কেন্দ্ৰীক আলোচনা, লেখা লিখা লোকৰ সংখ্যা কম নহয়। ইয়াৰে একাংশই লিখে প্ৰচাৰৰ কথা মনত ৰাখি, একাংশই বিশেষ ধাৰাৰ কথা মনত ৰাখি আৰু কম সংখ্যকে বিশেষ চিনেমাৰ প্ৰতি আকৰ্ষণ অনুভৱ কৰি। ইয়াৰ মাজৰে একাংশই (হয়তো অপ্ৰিয়, কিন্তু সত্য) মুষ্টিমেয় একাংশৰ চিনেকৰ্মৰ সপক্ষে, মুষ্টিমেয় একাংশৰ চিনেকৰ্মৰ বিপক্ষে লিখে, আৰু সেয়া 'সমালোচনা'ৰ নামত কাকত-আলোচনীত ছপা হয়। বিশ্লেষণ কৰিলে স্পষ্ট হয়--, এনে লেখাই কোনো পক্ষৰ ক্ষতি কৰে, কোনো পক্ষৰ কেতিয়াবা লাভ হয়, স্থানীয় বজাৰত। আৰু লোকচান হয় চিনেমাৰ। (সাংবাদিক গৌতম শৰ্মাই ভাষণ প্ৰসংগত সপক্ষে-বিপক্ষে 'প্ৰচাৰ' কৰাৰ কথাও কৈছিল।) এই যে চিনেমাৰ লোকচান হৈছে, হৈ আছে --একমাত্ৰ সংবাদ মাধ্যমৰ দোষত। (আৰু আছে😊)cinema by Utpal Mena