"মানুহক প্ৰথম পৰিচয় মাতৃভাষাৰে দিব লাগে..."

টাবেন টামুক-- মানুহ জনৰ নাম। পাছিঘাটৰ এখন গাওঁ টেবোত ঘৰ মানুহ জনৰ। কিছু দিন পূৰ্বে পাছিঘাটত উন্মোচন হৈছিল আমাৰ সম্পাদনাত প্ৰকাশ পোৱা #Bhupen_Hazarika_vol_lll গ্ৰন্থ খন। অনুষ্ঠানটো পৰিপাটিকৈ আয়োজন কৰাত আগভাগ লৈছিল মাৰ্টিনে। এদিন মাৰ্টিনে লৈ গ'ল তেওঁলোকৰ ঘৰলৈ। নিশা ৮ মান বজাত। নিৰ্জন ঘৰ। মাৰ্টিন আৰু মাক-দেউতাক থাকে। সেই সময়ত মাক আছিল চাংঘৰত, খোৱা-লোৱাত ব্যস্ত! দেউতাক টাবেন টামুক ব্যস্ত, আপঙৰ সোৱাদ লৈ, নিজৰ সৈতে। ("নিজৰ লগতে ব্যস্ত আছোঁ দে, নিজৰ সৈতে কথা পাতি আছোঁ! তয়ো এবাতি লবি নেকি!" --আমি গৈ ওচৰত ঠিয় হোৱাত, মাটিত বহি থকাৰ পৰা উঠিছিল। আৰু কৈছিল টাবেন টামুকে।) 

আমাৰ সৈতে যোৱা হৰিয়ে সুধিছিল টাবেন টামুকক, হিন্দীত-- "ভালে আছে..."। 

টাবেন টামুকে খং কৰিছিল। কৈছিল-- "মানুহক প্ৰথম পৰিচয় মাতৃভাষাৰে দিব লাগে। তই যাৰ সৈতে কথা পাতিছ, সি যদি তোৰ মাতৃভাষা নুবুজে তেতিয়াহে হিন্দী বা ইংৰাজী ক'ব লাগে। তহতে আৰু ইংৰাজী মিডিয়ামহে! হিন্দী কথা কৈ তহতে নিজকে ডাঙৰ মানুহ বুলি ভাৱ! তহতৰ বাবেই অসমীয়া ভাষাটো এদিন হেৰাই থাকিব! যিদিনা হেৰাই থাকিব, সেই দিনা বুজিবি--, মাতৃভাষা হেৰাই থকাৰ দুখ! তেতিয়া আৰু দুখ কৰি লাভ নহব! ..."

মই অসমীয়াতে কথা পাতিছিলোঁ। টাবেন টামুক সন্তুষ্ট হৈছিল। মোক সাৱতি ধৰিছিল। কৈছিল-- "অসমীয়া ভাষাটো ধৰি ৰাখিবি। আমি হেৰুৱালো। অসমীয়া মাধ্যমত পঢ়িছিলোঁ। লাহে লাহে অসমীয়া মাধ্যমৰ স্কুলবোৰ নোহোৱা হ'ল। অৰুণাচলৰ মানুহে ইংৰাজী, হিন্দীত কথা কবলৈ বাধ্য হ'ল। আমাৰ ভাষা অসমীয়া হৈ থাকিলে আমি বেছি উন্নতি কৰিব পাৰিলো হয়। এতিয়া আমাৰ বেছি ভাগ ল'ৰা-ছোৱালীয়ে নিজৰ ভাষা মানে, ইংৰাজী-হিন্দী বুলিয়ে জানে! তই আমাৰ ইয়াৰে ল'ৰা-ছোৱালীৰ লগত অসমীয়াত কথা পাতিবি। সিহতে অসমীয়া বুজে। অসমৰ পৰা অহা মানুহ খিনিয়ে আমাৰ ল'ৰা-ছোৱালীৰ সৈতে অসমীয়াত কথা পাতিলেহে অসমীয়া ভাষাটো ভালদৰে শিকিব!"

 (মাৰ্টিনৰ সৈত আমি ইংৰাজী বা হিন্দীত কথা পতিছিলোঁ। টাবেন টামুক লগ পোৱাৰ পাছৰে পৰা মাৰ্টিনৰ সৈতে অসমীয়াত কথা পাতিছিলোঁ। 

মাৰ্টিনে অসমীয়া বুজে, মাৰ্টিনে আমাক চিনাকী কৰি দিয়া প্ৰতি গৰাকীয়ে অসমীয়া বুজে, অসমীয়া ক'ব পাৰে।)

অসমীয়া ভাষা, গীত, ভূপেন হাজৰিকা ইত্যাদি বিষয়ত কথা পাতি আমি টাবেন টামুকৰ ঘৰৰ পৰা উভতিছিলো। টাবেন টামুকে কৈছিল-- "আৰু আহিবি! মোৰ ঘৰলৈ সমুজ্জ্বল কুমাৰ ভট্টাচাৰ্য, হৃষিকেশ গোস্বামী, কৃষ্ণমণি চুটিয়া আহি থাকে! তয়ো আহি থাকিবি।

(টাবেন টামুক মানুহ জনক মোৰ ভাল লাগিছিল। মনলৈ ভাৱ আহিছিল-- এনে মানুহক শ্ৰদ্ধা জনোৱা উচিৎ! আৰু পাছ দিনা শ্ৰদ্ধা জনাইছিলোঁ মোৰ "Bhupen Hazarika vol lll" -ৰ উন্মোচনী অনুষ্ঠানত।)