নতুন চিন্তাৰে, ন-প্ৰজন্মক মনত ৰাখি নাট প্ৰযোজনা কৰাৰ বাহিৰে গত্যান্তৰ নাই ভ্ৰাম্যমাণ থিয়েটাৰৰ। কাৰণ স্পষ্ট-- বজাৰ চিন্তা, বজাৰ সফলতা ভ্ৰাম্যমাণৰ নাট্যযাত্ৰাৰ মূল মন্ত্ৰ। এই কথা অস্পষ্ট নহয়-- থিয়েটাৰ মানেই নাট্যশিল্প; কিন্তু ভ্ৰাম্যমাণ থিয়েটাৰৰ নাট্যচিন্তা বজাৰ কেন্দ্ৰীক। এই কথা মনত ৰাখি ক'ব লাগিব ২০২৩-২৪ নাট্যবৰ্ষটোৰ সফল প্ৰযোজনা-- কহিনুৰৰ 'এ বি চি ডি' (নাট্যকাৰ: মৃদুল চুতীয়া), ৰাজমুকুটৰ 'ব্ৰহ্মচাৰী' (নাট্যকাৰ: ৰাজদ্বীপ), ৰাজতিলকৰ 'অৰ্ধনাৰী' (নাট্যকাৰ: চম্পক শৰ্ম), বৃন্দাবনৰ 'প্ৰভুভক্ত', অভিনন্দনৰ 'নৰ্তকী নন্দীতা' (নাট্যকাৰ: প্ৰণৱ বৰুৱা), নয়নতৰাৰ 'একলব্য' (নাট্যকাৰ: সমৰেন্দ্ৰ বৰ্মন),
আমাৰ ধাৰণাত চলিত নাট্যবৰ্ষত ভ্ৰাম্যমাণ থিয়েটাৰৰ শ্ৰেষ্ঠ নাটকৰ তালিকা খন এনে ধৰণৰ হ'ব-- 'অৰ্দ্ধাংগিনী', 'এ বি চি ডি', 'আঁকৰী তই পগলা মই'। --এইনাটক তিনি খন দক্ষিণ ভাৰতৰ বা বলিউডৰ চিনেমাৰ জনপ্ৰিয় ধাৰাৰ নহয়, ভ্ৰাম্যমাণ থিয়েটাৰৰ-- শিপাৰ ওচৰৰ, নিজা শৈলীৰ। আৰু নাটক তিনি খন দৰ্শকে, নাট্যৰসিকে আদৰি লৈছে।
চলিত বৰ্ষটোত এই কেইটা দিশ স্পষ্ট-- দৰ্শকৰ আসনত তৰুণ প্ৰজন্মৰ সংখ্যা কম, ভ্ৰাম্যমাণ থিয়েটাৰৰ নিজা শৈলীৰ নাটকহে দৰ্শকে পছন্দ কৰিছে, নতুন নাট্যকাৰৰ জন্ম হোৱা নাই, নতুন অভিনেতা-অভিনেত্ৰী আভিনয় ক্ষমতাৰে চৰ্চালৈ অহা নাই, অভিনয় আৰু প্ৰযোজনাত প্ৰস্তুতি পৰাশৰ অপ্রতিদ্বন্দ্বী, পৰিকল্পনাৰ অভাৱত বা মাধ্যমটোত দখল নথকা প্ৰযোজকৰ বাবে কেইবাটাও নাট্যদলত খেলিমেলি স্পষ্ট হৈছে। খেলিমেলিৰ বাবে কেইবাটাও নাট্যদল বন্ধ হৈছে (থিয়েটাৰ ভাগ্যদেৱীৰ দৰে নাট্যদলে আধাতে নাট্যযাত্ৰা সামৰাটো নাট্যবৰ্ষটোৰ দুখৰ খবৰ), বন্ধ হোৱাৰ বাটত। আনহাতে যাত্ৰাৰ বাবে সাজু হৈছে নতুন-নতুন নাট্যদল।
চলিত নাটবৰ্ষটোত চৰ্চাত থকা অভিনেতে-অভিনেত্ৰীৰ তালিকা খন এনেধৰণৰ-- প্ৰস্তুতি পৰাশৰ, মৃদুল ভূঞা, কৃষ্ণমণি নাথ, চম্পক শৰ্মা, সঞ্জীৱ শৰ্মা, উৎপল দাস, কাজল শৰ্মা, ৰাতুল দাস, প্ৰাঞ্জনা দত্ত।
চলিত নাট্যবৰ্ষটো বিশ্লেষণ কৰিলে এই দুটা দিশ স্পষ্ট ৰূপত দেখা যায়-- এই প্ৰজন্মৰ নাট্যৰসিকক সন্তুষ্ট কৰাৰ বাট মুকলি নকৰিলে "ভ্ৰাম্যমাণৰ বজাৰ'ত সমস্যা বাঢ়িব। এয়া প্ৰথমটো দিশ। দ্বিতীয়টো দিশ-- প্ৰযোজকৰ আকাল। প্ৰযোজনাৰ বাবে নাটকৰ্মী সকল আগবাঢ়ি নাহিলে ভ্ৰাম্যমাণ থিয়েটাৰৰ বাট চমু হ'ব। নাট্যগতি দ্ৰুত নহব। 'মালিক'ৰ ভ্ৰাম্যমাণ থিয়েটাৰে এই প্ৰজন্মৰ বাবে যে নতুন বাট কাটিব নোৱাৰে, এয়া খাটাং। (নলবাৰী, যোৰহাট, পাঠশালা, গুৱাহাটীৰ ১২৬ গৰাকী 'দৰ্শক'ৰ মতা-মতক গুৰুত্ব দি চৰ্চা কৰা হৈছে।) প্ৰকাশ: অসমীয়া খবৰ ১/১/২০২৪
মন্তব্যসমূহ
একটি মন্তব্য পোস্ট করুন