সেই সময়ত মৃদুল চুতীয়াক লগ পোৱা নাছিলোঁ, মৃদুল চুতীয়াৰ মুখা-মুখি হোৱা নাছিলোঁ। হেঙুল থিয়েটাৰৰ মঞ্চত ("অস্তপথ" ২০০৪-০৫, "মোৰ শ্ৰদ্ধাৰ প্ৰভু হনুমান" আৰু "প্ৰজন্ম" ২০০৬-০৭, "আত্মলিপি" ২০০৪-০৬ নাট্যবৰ্ষত) অভিনয়, পৰিচালনা শৈলী, নাট্যকৰ্মী গৰাকীয়ে ৰচনা কৰা নাটক চোৱাৰ পাছত অনুভৱ কৰিছিলোঁ-- মৃদুল চুতীয়াৰ নাট্যচিন্তা আন নাট্যকাৰ, পৰিচালকতকৈ বহুত বেলেগে। ভ্ৰাম্যমাণ থিয়েটাৰত নিজা শৈলীৰে সুস্থ নাটকৰ নতুন বাট কাটিছিল নাট্যকৰ্মী গৰাকীয়ে।
--নাটক কেইখন চাইছিলোঁ, লিখিছিলোঁ। ভাল নাটকৰ চৰ্চা কৰি আনন্দ অনুভৱ কৰিছিলোঁ। ইমানেই।
২০০৭-০৮ নাট্যবৰ্ষ। বৰদৈচিলা থিয়েটাৰত চুক্তিবদ্ধ হৈছিল মৃদুল চুতীয়া। নাট্যদলটোৰ প্ৰযোজক গৰাকীৰ প্ৰথম পৰিচয়-- সচেতন নাট্যকৰ্মী। ধাৰণা কৰিছিলোঁ, মৃদুল চুতীয়াই সেই নাট্যবৰ্ষটো নাট্য চমক দেখুৱাব! দেখুৱালে। কিন্তু নাটক খন আখৰালৈ নিয়াৰ, মঞ্চলৈ নিয়াৰ আগতে এক "অদৃশ্য শক্তি"ৰ বাধা অতিক্ৰম কৰিহে।
খবৰ পাইছিলোঁ-- "মৃদুল চুতীয়াই আৰু নাটক নিলিখে।"
--এই খবৰৰ আঁত ধৰি "অসমীয়া খবৰ"ত লিখিছিলোঁ-- "ফাঁচিৰ কাঠড়াত এগৰাকী নাট্যকাৰ"। লেখাটো প্ৰকাশ হোৱাৰ পাছতে চৰ্চা হৈছিল, "চৰ্চা"ই নাট্যদলটোৰ প্ৰযোজকক বাধ্য কৰাইছিল, "নাটক" খনক গুৰুত্ব দিবলৈ।
নাটক খনৰ শিৰোণাম-- "ভগ্নাৱশেষ"।
--সেই তেতিয়াৰ পৰা ২০১৫-১৬ নাট্যবৰ্ষলৈ (নাটক: লংকাবিহীন ৰাৱন") মৃদুল চুতীয়াৰ নাটক (আন নাট্যকাৰৰ নাটকৰ লগতে) চাইছিলোঁ, চৰ্চা কৰিছিলোঁ। (২০১৫-১৬ নাট্যবৰ্ষৰ পাছৰ পাৰা মই ভ্ৰাম্যমাণ থিয়েটাৰৰ এখনো নাটক চোৱা নাই। কিয় চোৱা নাই! --সেয়া আন এক অধ্যায়।)
--এই সময় চোৱাত অতুল মজুমদাৰ, ৰাকেশ প্ৰকাশ-- আমি কেইজন মানহে মৃদুল চুতীয়াৰ নাট্যকৰ্ম চৰ্চা কৰিছিলোঁ।
--বিপৰীতে সেই "অদৃশ্য শক্তি"ৰ বাধা আৰু বলিউড, তামিল-তেলেগু চিনেমাৰ ("জনপ্ৰিয় মচলা, নকল") শৈলীৰ নাটকৰ "বিজ্ঞাপন ধৰ্মী" লেখাৰ এখন অতিক্ৰম কৰিব নোৱাৰা দেৱাল!
--অৱশেষত হাৰি গ'ল (নাটকৰ বাটত নহয়, ভ্ৰামমাণ থিয়েটাৰত।)!
ভ্ৰাম্যমাণ থিয়েটাৰৰ পৰা আঁতৰি গ'ল। ব্যস্ত হ'ল চিনেমা ইত্যাদিৰ কামত।
২০২৩-২৫ নাট্যবৰ্ষ। কথাৰ মাজতে মৃদুল চুতীয়াই ক'লে-- নাটক এখন লিখিছে। "এ বি চি ডি"। কহিনুৰ থিয়েটাৰৰ প্ৰযোজক তপন লহকৰৰ আগ্ৰহত, তাগিদাত।
--নাটক গুৰুত্ব দি প্ৰযোজনা কৰিছিল তপনে! সফল হ'ল। দৰ্শকে ভাল পালে।
২০২৪-২৫ নাট্যবৰ্ষ। আকৌ "কহিনুৰ"ৰ বাবে নাটক লিখিলে মৃদুল চুতীয়াই। পৰিপাটি, মাৰ্জিত সংলাপৰ লগতে জ্যোতি সংগীতৰ ব্যৱহাৰ কৰিছে নাটক খনত। চোৱ নাই।শুনিছোঁ। পঢ়িছো-- ভিন্ন চৰ্চাত।
--এইবাৰ চৰ্চা অতুল মজুমদাৰ, ৰাকেশ প্ৰকাশ, আমি কৰা নাই। চৰ্চা কৰিছে, সেই সকলেও, যি সকল "অদৃশ্য শক্তি"ৰ অংশ আছিল। "বিজ্ঞাপন ধৰ্মী" লেখাৰে "বলিউড, তামিল-তেলেগু চিনেমাৰ জনপ্ৰিয় মচলা" প্ৰয়োগ কৰি, নকল কৰি কৰা "নাট্যকৰ্ম"ৰে ভ্ৰাম্যমাণ থিয়েটাৰৰ "নাট্য শৈলী"ৰ ক্ষতি কৰা, কৰি থকা নাটকক উৎসাহ দিছিল, উৎসাহ দি আছে।
২০২৪-২৪ বৰ্ষত মৃদুল চুতীয়াৰ ৰচনা-পৰিচালনাৰে তপন লহকৰে প্ৰযোজনা কৰা "পিঞ্জৰা" চাবলৈ দৰ্শকে ভিৰ কৰাৰ খবৰ পাইছোঁ, দৃশ্য মাধ্যমত দেখিছোঁ। পূৰ্বৰ দৰে মৃদুল চুতীয়াৰ এই নাটক খনৰো সৌন্দৰ্য-- সংলাপ, "চৰিত্ৰ", অভিনয়, সংগীত বুলি "দৰ্শক" মুখত শুনিছোঁ। জেৰিনা বৰুৱা নামৰ অভিনেত্ৰী গৰাকীয়ে মন চুই যোৱা অভিনয় কৰিছে বুলি শুনিছোঁ। ...
"চাৰ্কাছ-নাটক"ৰ বিপৰীতে "পিঞ্জৰা"ৰ এই সফলতা "নাটকৰ জয়"।
স্পষ্ট-- "অভিনয় চমক", "সংলাপ চমক"ৰ বাবেও ভ্ৰাম্যমাণ থিয়েটাৰৰ নাটক চাবলৈ দৰ্শকে ভিৰ কৰে! আজিৰ দৰ্শকেও।
মন্তব্যসমূহ
একটি মন্তব্য পোস্ট করুন