-- কাৰ গীত?
-- ডঃ ভূপেন হাজৰিকাৰ।
'সেই সীমাৰ সিপাৰে তৃপ্তি আমাৰ মাজতে তৃষাৰে নৈ...'
-- কাৰ গীত?
- ডঃ ভূপেন হাজৰিকাৰ।
শুদ্ধ, কিন্তু 'উত্তৰ' সম্পূর্ণ শুদ্ধ নহয়। 'আই তোেক....'ৰ সুৰ-কণ্ঠ-ডঃ ভূপেন হাজৰিকাৰ। কথা কিন্তু সংগীতসূৰ্যৰ নহয়, মুকুল বৰুৱাৰ।
গুৱাহাটীৰ যোৰ পুখুৰীত ১৯২৬ চনত জন্মলাভ কৰা মুকুল বৰুৱাই ১৯৪৬ চনৰ পৰা আকাশবাণী কলিকতা কেন্দ্ৰৰ পৰা গীত পৰিৱেশনৰ সুযোগ পাইছিল।
মুকুল বৰুৱাৰ জন্ম "সংগীতৰ পৰিয়াল"ত। কৰ্মবীৰ নবীন চন্দ্ৰ বৰদলৈৰ আজোনাতি, নলিনীবালা দেৱীৰ নাতি। শৈশৱ-কৈশোৰ পাৰ কৰিছিল নবীন চন্দ্ৰ বৰদলৈৰ ঘৰতে। নবীন চন্দ্ৰ বৰদলৈ আছিল এজন ভাল গীতিকাৰ, সুৰকাৰ ('তীৰ্থযাত্ৰী'/ ১৯৬০, নবীন চন্দ্ৰ বৰদঠলৈৰ কবিতা আৰু গীতৰ সংকলন)। আইতাকো আছিল সংগীত অনুৰাগী-- সেই সময়ৰ প্ৰচলিত অসমীয়া, বঙলা গীত, বিশেষকৈ অসমীয়া লোকসংগীত দখল আছিল। গাইছিল। স্বাভাৱিকতে ঘৰখনলৈ সংগীতৰ মানুহ আহিছিল, ঘৰখনত সাংগীতিক পৰিবেশ আছিল। সংগীতৰ কোনো আনুষ্ঠানিক শিক্ষা নথকা মুকুল বৰুৱাৰ সেই ঘৰখনেই আছিল সংগীতৰ পাঠশালা।
বৰুৱাই ১৯৪৮ চনত (আকাশবাণীৰ গুৱাহাটী কেন্দ্ৰৰ জন্মলগ্নতে) আকাশবাণীৰ চাকৰিত যোগদিয়ে আৰু ১৯৮৭ চনৰ ৩১ অক্টোবৰত চাকৰিৰ পৰা অবসৰ লয়।
'গীতিকাৰ মুকুল বৰুৱা'ক আমি বিচাৰি পাওঁ-- 'ভাৰতৰ নুমলী জী হেনো এইখন অসমী...',
'কিনো অপৰূপা তুমি আই অসমী...' আদি গীতৰ মাজত। 'ভাৰতীৰ নুমলী...'গীতটো গাই উৰিষ্যাৰ বিখ্যাত কণ্ঠশিল্পী অক্ষয় মাহন্তিয়ে প্রচুৰ জনপ্রিয়তা লাভ কৰিছে।
গীতিকাৰ, সুৰকাৰ মুকুল বৰুবাই পাঁচখন অসমীয়া চিনেমাৰ বাবেও সংগীত ৰচনা কৰিছিল। চিনেমাকেইখন হ'ল-- 'সৰাপাত', 'তেজীমলা', 'চাকনৈয়া', 'সোণ পখিলী' আৰু 'কোলাহল'। অর্কেস্ট্রা বজোৱাত ওস্তাদ সংগীত শিল্পীগৰাকীয়ে চৰ্চাৰ বিষয় হৈ পৰিছিল 'চৈ দিয়া গৰুৰ গাড়ীত কাৰ বিয়া যায়...' আদি গীতেৰে।
এতিয়া আহিছো দ্বিতীয়টো 'প্রশ্ন'লৈ। 'সেই সীমাৰ...' গীতটোৰ কণ্ঠহে ডঃ ভূপেন হাজৰিকাৰ। কথা-নির্মল প্রভা বৰদলৈৰ, সুৰ- মুকুল বৰুৱাৰ। সুৰকাৰ হিচাপে মুকুল বৰুৱাক আমি বিচাৰি পাঁও- 'হাতো নেমেলিবি ফুলো নিছিঙিবি...', 'মোক এটি সুৰ কৰি তোলা...', 'লুইতে নাযাবা অ' লুইত কোঁৱৰ...', 'কথাৰে নহয় বন্ধু কামত পৰিচয়...', 'নিয়ৰৰে ফুল...' আদি গীতৰ মাজত। অসমীয়া সংগীতৰ ভৰাল চহকী কৰা এইগৰাকী শিল্পীৰ কায়িক মৃত্যু হয় ১৯৯৭চনত।
মুকুল বৰুৱাৰ গীত আৰু সুৰৰ প্ৰসংগত স্বাভাবিকতে বিভিন্নজনে চর্চা কৰি আহিছে। ডঃ ভূপেন হাজৰিকাই কৈছিল' মুকুল বৰুৱাই সংগীত জানে, সুৰ জানে। এই যে জানে, সেইবাবেই মুকুল বৰুৱাই লিখা গীত, শব্দবোৰ গাবলৈ ভাল লাগে। কাৰণ, ক'ব লাগিব জানো? শব্দবোৰ যে সুন্দৰ সুৰেৰে বন্ধ থাকে, সেইবাবে।...'
চিত্ৰবন (০১/০১/২০২০)
মন্তব্যসমূহ
একটি মন্তব্য পোস্ট করুন