"ইন্দ্ৰ-মালতী" (১৯৩৯)-- প্ৰথম খন বাণিজ্যিক সফল অসমীয়া চিনেমা। চিনেমা খনৰ লেখক-পৰিচালক জ্যোতিপ্ৰসাদ আগৰৱালাই লিখিছিল-- " 'ইন্দ্ৰমালতী'ত প্রায় ১৫,০০০ টকা খৰচ পৰিছে বুলিব পাৰি। এইখনত ইয়াৰ অভিনেতাসকলে একো বানচ লোৱা নাই। বানচ ল'লে আৰু কমেও প্রায় ২০০০/৩০০০ টকা খৰচ বাঢ়ি যায়। গল্প দিওঁতা, scenario লিখোঁতা, সঙ্গীত ৰচোঁতা আৰু ডিৰেক্টৰৰ বানচ হিচাপে যদি ১৫০০/২০০০ টকা ধৰা যায় তেন্তে খৰচ গৈ প্রায় কুৰি হেজাৰ হয়গৈ। তাৰ উপৰিও ফিল্মখন সাধাৰণ ফিল্মতকৈ চুটি কৰিও প্রায় ৪/৫ হেজাৰ খৰচ কমোৱা হৈছে। কিন্তু আগলৈ যিবোৰ অসমীয়া ফিল্ম ওলাব তাত প্রডিউচাৰজনে এই আটাইকেউটা খৰচেই কম বেছি হিচাপে কৰিব লাগিব। মুঠতে যেনে তেনেই কুৰি হেজাৰ টকাৰ কমে অসমীয়া কথাছবি হোৱা টান আৰু সেইখিনি হ'লেই, ব্যৱসায় হিচাপে কথাছবি উলিওৱা কৃতকাৰ্য্য নহ'ব।..." গতিকে ক'ব পাৰি এৰা-ধৰাৰ মাজেৰেহে চিনেমা খন "স্থানীয় বজাৰত সফল হৈছিল।
"ইন্দ্ৰ-মালতী"ৰ বাটেৰে আগবঢ়া অসমীয়া চিনেমাৰ সফলতাৰ বাট বহল কৰিছিল বিষ্ণুপ্ৰসাদ ৰাভা আৰু ফণী শৰ্মাৰ পৰিচালনাৰে নিৰ্মিত "ছিৰাজ" (১৯৪৮)-এ। প্ৰথম খন ছুপাৰ-হিট অসমীয়া চিনেমা বুলি ক'ব পাৰি। দুখৰ কথা-- অপৰিপাটি বিতৰণ ব্যৱস্থাৰ বাবে বাণিজ্যিক সফলতাৰ ভাগ প্ৰযোজক পক্ষই নাপালে। --এই তথ্য পাইছিলোঁ অভিনেতা-লেখক দিলীপ কুমাৰ হাজৰিকাৰ পৰা। আমাৰ অনুৰোধত "চিৰাজ" কেন্দ্ৰিক লেখা এটা লিখিছিল "নিয়মীয়া বাৰ্তা"ৰ বাবে-- "যুদ্ধৰ পাছত, স্বাধীনতাৰ পাছত অসমৰ চিনেমা জগতত এটা ডাঙৰ আলোড়ন আহি পৰিল 'ছিৰাজ'ক লৈ। ছবিৰ মাজেদি যে এটা জাতি জাগি উঠিব পাৰে, সেয়া যেন ছিৰাজৰ মাজেৰে প্রতিভাত হৈ উঠিছিল। ছবিৰ ব্যৱসায়িক সাফল্য, ছবিৰ সফল পৰিচালক এজন কেনেকৈ হ'ব পাৰে, এজন ভাল অভিনেতা কেনেকৈ ছবিৰ মাজেৰে জিলিকি উঠিব পাৰে এই সকলো যেন দেখুৱালে ছিৰাজে। ছবিৰ ব্যৱসায়িক দিশটোৰ কথা প্ৰথমবাৰ উদঙাই দেখুৱালে 'ছিৰাজ' চলচ্চিত্ৰই। 'ছিৰাজ'ৰ জনপ্রিয়তাই, 'ছিৰাজ'ৰ সফলতাই অসমৰ ছবি জগতলৈ একপ্ৰকাৰ যৌৱন বোৱাই আনিছিল। মই শিৱসাগৰত দেখিছিলোঁ চিনেমা হলৰ আগত কলগছ ৰুইছে আৰু গৰু গাড়ীৰে অবিৰাম মানুহ আহি আছে। ১০ বজাত শ্ব' দিবলগীয়া হৈছিল 'ছিৰাজ'ৰ।..."
"ডক্তৰ বেজবৰুৱা" --আন এখন "ছুপাৰহিট" অসমীয়া চিনেমা। ব্ৰজেন বৰুৱাৰ পৰিচালনাৰে নিৰ্মিত এই চিনেমা খনক অসমীয়া চিনেমাৰ এটা টাৰ্ণিং পইণ্ট বুলি কোৱা হয়। বাণিজ্যিক দিশত সফল এই চিনেমা খনে ৰাষ্ট্ৰীয় চলচ্চিত্ৰ বঁটা (regional languages of India-শিতানত) লাভ কৰিছিল ১৯৬৯ চনত।
পৰৱৰ্তী সময়ত বাণিজ্যিক দিশত সফল হোৱা চিনেমাৰ তালিকা খন এনেধৰণৰ-- "মুকুতা", "মানৱ আৰু দানৱ", "যোগ বিয়োগ", "ওপজা সোণৰ মাটি", "ভাইটি", "সোণতৰা", "চামেলি মেমচা'ব", "তৰামাই", "সোণমা", "মৰমী", "মৰম", "মেঘমুক্তি", "ৰাংঢালী", "দূৰণীৰ ৰং", "আজলী নবৌ", "ঘৰ-সংসাৰ", "ককাদেউতা নাতি আৰু হাতী", "জীৱন সুৰভী", "সেন্দুৰ", "সোণমইনা", "সূৰুয", "বহাগৰ দূপৰীয়া", "মন মন্দিৰ", "পূজা, "পিতা-পুত্ৰ", "ভাই ভাই", "ৰঙা নদী", "পাহাৰী কন্যা", "সূৰ্য তেজৰ অন্য নাম", "প্ৰেম জনমে জনমে", "ৰিক্সাৱালা", "হৃদয়ৰ আঁৰে আঁৰে". "যৌৱনে আমনি কৰে", "মহাৰথী", "বুকুৰ মাজত জ্বলে", "হিয়া দিয়া নিয়া", "জোন জ্বলে কপালত", "কইনা মোৰ ধুনীয়া", "নায়ক", "কন্যাদান", "মাঘত মামণিৰ বিয়া", "উজনিৰ দুজনি গাভৰু", "দাগ",
"চুৰেন চোৰৰ পুতেক", , "ৰামধেনু", "মিছন চাইনা"...।
"মিছন চাইনা"ৰ আগলৈকে অসমীয়া চিনেমাৰ স্থানীয় বজাৰ খন ঠেক আছিল। "big budget, big market" ধাৰণাটো আৰম্ভ হৈছে জুবিন গাৰ্গৰ নেতৃত্বত "মিছন চাইনা"ৰে। চৰ্চা মতে, চিনেমা খনৰ বাজেট: প্ৰায় ২ কোটি টকা। প্ৰথম পৰ্যায়ত সৰ্বমুঠ আয় ৬.০৭ কোটি টকা (২০১৭)। সেই সময়ত ভাবিব নোৱাৰা "বজাৰ চিন্তা"। জুবিন গাৰ্গৰ পৰিচালনাৰে নিৰ্মাণ কৰা কাঞ্চনজংঘা (২০১৯) ও "স্থানীয় বজাৰ"ত সফল। ১.৫ কোটি টকা বাজেটৰ চিনেমা খনৰ সৰ্বমুঠ আয়: প্ৰায় ৫.১২ কোটি টকা। এই "সফলতাৰ বাটেৰে" আগবাঢ়ে "ৰত্নাকৰ" (২০১৯)। যতীন বৰাৰ পৰিচালনা। ১.৩ কোটি টকা বাজেটৰ চিনেমা খনৰ সৰ্বমুঠ আয় ৯.২৩ কোটি টকা।
--নিপন গোস্বামীৰ পৰিচালনাৰে নিৰ্মাণ কৰা "ডক্তৰ বেজবৰুৱা-২" (২০২৩/ বাজেট ২.৫ কোটি টকা/ সৰ্বমুঠ আয় প্ৰায় ৭ কোটি টকা।) "বক্স অ'ফিচ" সফল চিনেমাৰ তালিকাভুক্ত কৰিব পাৰি।
জুন ২০২৩-ত চিত্ৰগৃহলৈ আহে "শ্ৰী ৰঘুপতি"। সুব্ৰত কাকতিৰ পৰিচালনা। ২ কোটি টকা বাজেটৰ এই চিনেমা খনৰ সৰ্বমুঠ আয় প্ৰায় ১৪ কোটি টকা।
২০২৪-ত চিত্ৰগৃহলৈ অহা দুখন বাণিজ্যিক দিশত সফল অসমীয়া চিনেমা-- "বিদূৰভাই", "স্বৰ্গৰথ"। বিভিন্ন চৰ্চাত কম বাজেটৰ চিনেমা বুলি কোৱা হৈছে। সুব্ৰত কাকতিৰ পৰিচালনাৰে নিৰ্মাণ কৰা "বিদূৰভাই"ৰ সৰ্বমুঠ আয় প্ৰায় ৬ কোটি টকা। আৰু ৰাজেশ ভূঞাৰ পৰিচালনাৰে নিৰ্মাণ কৰা "স্বৰ্গৰথ"ৰ (বাজেট:৩৮ লাখ টকা) সৰ্বমুঠ আয় ১,৬৮,৮৫,২৬৩ টকা।
(ক্ৰমশঃ)
--উৎপল মেনা
৫জুন, ২০২৫
মন্তব্যসমূহ
একটি মন্তব্য পোস্ট করুন