চিনেমাৰ জুবিন

জুবিন গাৰ্গ অভিনেতা নাছিল। "অভিনেতা জুবিন" নিৰ্মাণ কৰিছিল বা নিৰ্মাণ কৰাইছিল। "গায়ক ইমেজ"ৰ পৰা "নায়ক ইমেজ"ৰ মাজত বন্দী হব পাৰিছিল "মনযায়"ত। এম মণিৰামৰ পৰিচালনাৰে নিৰ্মান কৰা অসমীয়া চিনেমা "মনযায়"ত মানৱৰ চৰিত্ৰত দৰ্শকে, চিত্ৰৰসিকে গ্ৰহণ কৰিছে। চিনেমা খন চিত্ৰগৃহলৈ আহিছিল ২০০৮ চনত। বিশ্লেষণ কৰিলে স্পষ্ট হয়-- মানৱ কিন্তু "জুবিন"ৰ পৰা মুক্ত নাছিল। মানৱে কথা কৈছিল (সংলাপ প্ৰক্ষেপন কৰিছিল) জুবিনৰ দৰে। চেহেৰা-শৰীৰ ভাষাতো মানৱ "জুবিন"ৰ পৰা মুক্ত নহয়। তথাপি চিত্ৰৰসিকে জুবিনৰ অভিনয় গ্ৰহণ কৰিছে। মুনিন বৰুৱাৰ "দীনবন্ধু" (২০০৪)-ৰ বিপুলকো দৰ্শকে গ্ৰহণ কৰিছে। চৰিত্ৰ দুটাৰ মাজত দূৰত্ব অতি কম। কিন্তু বিপুলতকৈ মানৱ বেছি উজ্বল। "চৰিত্ৰ" দুটাক চিত্ৰৰসিকে ইতিবাচক সহাৰি দিয়াৰ প্ৰাথমিক কাৰণ-- cinematic acting, যাক আমি বাস্তবিক অভিনয় (realistic acting) বুলিব পাৰোঁ। আমাৰ ধাৰণা-- জুবিনে সততে (যদিওবা চিনেমা পৰিচিলকৰ মাধ্যম) "জুবিন"ৰ মাজতে থাকি "চৰিত্ৰ"ক গতি দিয়ে বা পৰিচালকক চৰিত্ৰ নিৰ্মাণত সহায় কৰে। 

"তুমি মোৰ মাথোঁ মোৰ"ত জুবিনে (চিনেমা খনৰ পৰিচালক: জুবিন গাৰ্গ। প্ৰথম পৰিচালনা। চিত্ৰগৃহলৈ আহিছিল ২০০০ চনত।) নিজকে ৰোমাণ্টিক হিৰো ইমেজত নিৰ্মাণ কৰিছিল। স্বাভাৱিকতে কেচা অভিনয়। এই বাটে আগবাঢ়ি জুবিনে পৈনত অভিনৰে পৰিচালকক চৰিত্ৰ নিৰ্মাণত সহায় কৰিছিল "গানে কি আনে"ত (পৰিচালক: ৰাজেশ যশপাল। চিত্ৰগৃহলৈ আহিছিল ২০১৬-ত)। এই চৰিত্ৰটো বহু পৰিমানে "জুবিন ইমেজ" মুক্ত, যাৰ বাবে "ৰ’দৰ চিঠি" (পৰিচালক: বাহাৰুল ইছলাম। চিত্ৰগৃহলৈ আহিছিল ২০১৪-ত।), "ডক্টৰ বেজবৰুৱা ২" (পৰিচালক: নিপন গোস্বামী। চিত্ৰগৃহলৈ আহিছিল ২০২৩-ত।), "চিকাৰ" (পৰিচালক: দেবাংকৰ বৰগোহাঁই। চিত্ৰগৃহলৈ আহিছিল ২০২৪-ত।), "সাত নম্বৰৰ সন্ধানত" (পৰিচালক: আব্দুল মজিদ। চিত্ৰগৃহলৈ আহিছিল ২০১৬-ত।), "প্ৰিয়াৰ প্ৰিয়" (পৰিচালক: মুনিন বৰুৱা। চিত্ৰগৃহলৈ আহিছিল ২০১৭-ত।), "দি আণ্ডাৰৱৰ্ল্ড" (পৰিচালক: ৰাজেশ যশপাল। চিত্ৰগৃহলৈ আহিছিল ২০১৮-ত।), "ৰাজনীতি" (পৰিচালক: মঞ্জিত শৰ্মা। চিত্ৰগৃহলৈ আহিছিল ২০২২-ত।) -তকৈ ওপৰত ৰাখিব পাৰি। "চৰিত্ৰ" ভিন্ন। মুনিন বৰুৱাই "কমেডি হিৰো"ৰো বাট দিছিল। কিন্তু জুবিনে "জুবিন ইমেজ"-এৰেহে পৰিচালকৰ নিৰ্দেশ মানিছিল, আমাৰ ধাৰণাত। 

জুবিন গাৰ্গে নিজৰ বাবে নিৰ্মাণ কৰা দুটা চৰিত্ৰ-- কৰ্ণেল গোস্বামী (চিনেমা: মিছন চাইনা। ২০১৭।), অনিৰ্বাণ ভট্টাচাৰ্য (চিনেমা: কাঞ্চনজংঘা। ২০১৯।)। এয়াই সত্য-- চৰিত্ৰ দুটা "বলিউডী ষ্টাইল"ৰ। অভিনয়ৰ সুযোগ লোৱা নাছিল, "চৰিত্ৰ"ক লৈ কাহিনীক দ্ৰুত গতি দিয়াত গুৰুত্ব দিছিল। আমাৰ ধাৰণত-- দৰ্শকে "জুবিনৰ চিনেমা" বুলিয়ে গ্ৰহণ কৰিছিল। তুলনা মুলক ভাৱে কৰ্ণেল গোস্বামীতকৈ অনিৰ্বান শ্ৰেষ্ঠ (অভিনয়), অভিনয়-শক্তি প্ৰয়োগৰ বাবে কিছু "ফুটেজ" লৈছিল। 

--এই খিনিতে চৰ্চা নকৰিলে ভুল হ'ব-- জুবিন গাৰ্গে পৰিচালনা কৰা দ্বিতীয় আৰু তৃতীয় চিনেমা দুখনত "বজাৰ-চিন্তা"ত জোৰ দিছিল। লক্ষ্য আছিল-- অসমীয়া চিনেমাৰ বজাৰ খন বহল কৰা। "বিগ-বাজেট, বিগ-বাজাৰ"। সকলোকে আছৰিত কৰি ২ কোটি টকা বাজেটৰ "মিছন চাইনা" নিৰ্মাণ কৰিছিল। সফলো হৈছিল। চিনেমা খনৰ প্ৰথম পৰ্যায়ত সৰ্বমুঠ আয় ৬.০৭ কোটি টকা। "কাঞ্চনজংঘা" নিৰ্মাণ কৰিছিল ১.৫ কোটি টকা খৰচ কৰি। প্ৰথম পৰ্যায়ত সৰ্বমুঠ আয় ৫.১২ কোটি টকা। এই বাণিজ্যিক সফলতাই অসমীয়া চিনেমাৰ প্ৰযোজকক সাহস দিছে, নতুন বাণিজ্যিক বাট দেখুৱাছে। --জুবিনৰ এই সফলতাৰ মূল-মন্ত্ৰ আছিল আত্মবিশ্বাস। "অসমীয়া চিনেমা নচলে"ৰ দৰে কথা মনলৈ অনা নাছিল। "কিয় নচলিব, চলামেই" ধাৰণাৰে আগবাঢ়িছিল। ক'ব পাৰি-- জুবিনৰ সাহস আৰু বজাৰ-চিন্তা দক্ষতাৰ বাবেই "বিগ-বাজেট, বিগ-বাজাৰ" সূত্ৰ সফল হৈছে। 

আহিছোঁ-- জুবিনে অভিনয় কৰা "ৰৈ ৰৈ বিনালে"লৈ। জুবিনৰ চিনে-চিন্তাৰে ৰাজেশ ভূঞাই পৰিচালনা কৰা এই চিনেমা খনৰ বাজেট ৪ কোটি টকা। প্ৰথম দিনটোৰ সংগ্ৰহ ২.৫২ কোটি টকা। অসমীয়া চিনেমাৰ বজাৰত "নতুন ৰেকৰ্ড"। এই খিনিতে আমি এনে দৰেও চৰ্চা কৰিব পাৰো-- অসমীয়া চিনেমা ৰ "বজাৰ" খন আজিৰ তাৰিখতো বলিউদ বা তেলেগু ইত্যাদি চিনেমাৰ "বজাৰ"ৰ সৈতে তুলনা কৰিব পৰা পৰ্যায় পোৱা নাই। পোৱা সহজ নহয়। গতিকে তুলনা কৰা উচিৎ নহয়। যোৱা ৩১ অক্টোবৰত (২০২৫) চিত্ৰগৃহলৈ অহা তেলেগু চিনেমা (Baahubali: The Epic) "বাহুবলী"ৰ প্ৰথম দিনটোৰ মুঠ বাণিজ্য বিশ্বজুৰি প্ৰায় ১৯ কোটি টকা। ইয়াৰ মুঠ সংগ্ৰহ ভাৰতত প্ৰায় ১৫ কোটি টকা। এই বাণিজ্য মনত ৰাখি আমি "অসমীয়া চিনেমা" বা অসমীয়া ভাষাৰ চিনেমা এখনৰ "বাণিজ্য স্থান" নিৰ্ধাৰণ কৰিলে শুদ্ধ নহব। শুদ্ধ নহব-- এই বাণিজ্য মনত ৰাখি "বাহুবলী"ক প্ৰথম স্থানত ৰাখিলে। আমাৰ "অংক"ত-- যোৱা ৩১ অক্টোবৰত চিত্ৰগৃহলৈ অহা ভাৰতীয় চিনেমাৰ "বক্স অ'ফিচ ৰিপ'ৰ্ট"ত প্ৰথম স্থানত থাকিব লাগে "ৰৈ ৰৈ বিনালে"। "বাহুবলী"ৰ তুলনাত (আনুমানিক বাজেট: প্ৰায় ৪০০ কোটি টকা) "ৰৈ ৰৈ বিনালে"ৰ বাজেট অতি কম। ৪ কোটি টকা। 

--জুবিনৰ লক্ষ্য আছিল "ভাৰতীয় বাণিজ্যিক চিনেমা"ৰে ফেৰ মাৰা। সফল হ'ল-- জীৱনৰ শেষ চিনে কৰ্মৰে।

[জুবিনৰ "চিনেমাৰ গীত,সংগীত" আৰু "ৰৈ ৰৈ বিনালে"ৰ অভিনয় চৰ্চালৈ অনা নাই।]