চুই গ'ল-- গীতে, গীতৰ চিত্ৰায়নে।
চুই গ'ল-- জুবিনৰ অভিনয়ে। পূৰ্বৰ পৰিপাটি অভিনয় (দীনবন্ধু, মনযায়) -তকৈ শ্ৰেষ্ঠ ৰাউল।
চিনে-চিন্তা আছিল জুবিন গাৰ্গৰ। গতিকে ক'ব পাৰোঁ-- পুৰঠ হৈ আহিছিল চিনেকৰ্মী জুবিন গাৰ্গ। কাহিনী-ৰেখাৰ গতিত সংগীত প্ৰয়োগ, গীতৰ আৰু গীতাংশৰ সংযোজন, বিষয়-বস্তু প্ৰয়োগ (চিনে-সৌন্দৰ্যত চেকা নলগাকৈ সাহিত্যৰ ভাষাক গুৰুত্ব দি) চিনেমা খনৰ প্ৰথম ইতিবাচক দিশ।
জুবিনৰ এই চিনে-চিন্তা সংগীত কেন্দ্ৰিক।
--নাম আছিল ৰাহুল। অনা-অসমীয়া সংগীতৰ শিক্ষক ভিক্টৰ ছাৰে (অভিনয় কৰিছিল ভিক্টৰ বেনাৰ্জীয়ে) মাতিছিল ৰাউল বুলি। ছাৰৰ "ৰাউল" উচ্চাৰণ সলনি কৰিব নোৱাৰিলে ৰাহুলে। সময়ত ৰাউল নামেৰেই জনাজাত হ'ল। ৰাউল ৰূপালী গল্পটোৰ মূল বিন্দু। কাহিনীৰ গতি সৰল-ৰৈখিক। গতিত পৰিপাটি অতীত-চাৰণ প্ৰয়োগ।
--চিনেমা খনৰ কাহিনীৰ গতিত দেখা গৈছে "সন্ত্ৰাসবাদৰ দাগ"। বোম বিস্ফোৰণত চকু হেৰুৱালে ৰাউলে। কিশোৰ ৰাউলে দুচকু হেৰুৱালে। নেদেখা হ'ল। মনৰ মাজত সি হাহাকাৰ অনুভৱ কৰিলে। "মই নেদেখো ছাৰ!" ভিক্টৰ ছাৰে তাৰ হাতত তুলি দিলে-- গীতাৰ। musical instrument (বাদ্যযন্ত্র)।
সংগীতে পোহৰৰ বাট দিলে ৰাউলক।
সংগীতৰ "বহল পৃথিৱী" বিছাৰি সি মহানগৰী পালে। আহিয়ে সি অনুভৱ কৰিলে-- সি বিছৰা "সংগীতৰ পৃথিৱী" খন যেন মহানগৰীত নাই! সি ওভটাৰ বাট ল'লে। উভতি সি তাৰ গাওঁ পালে হেতেন, যদিহে দেবুদাক (চৰিত্ৰটো নিৰ্মাণ কৰিছে সৌৰভ হাজৰিকাক লৈ। অভিনেতা গৰাকীৰ "শ্ৰেষ্ঠ অভিনয়" যে ৰূপালী গল্পটোৰ বিশেষ সৌন্দৰ্য সন্দেহ নাই। সন্দেহ নাই-- অভিনেতা গৰাকীৰ ৰূপালী-কৰিয়াৰ শ্ৰেষ্ঠ অভিনয়।) লগ নাপালে হেতেন! বুকুত অসম আন্দোলনৰ যন্ত্ৰণা লৈ মহানগৰীত ৰেষ্টুৰেণ্ট এখন চলাই জীৱন পাৰ কৰি আছে দেবুদাই।
দেবুদাই ৰাউলক চিনাকী কৰি দিলে-- সংগীতৰ ছুপাৰষ্টাৰ নীড়ৰ সৈতে (চৰিত্ৰটো নিৰ্মাণ কৰিছে জয় কাশ্যপক লৈ)। নীড়ৰ সংগীত-চিন্তা ৰাৱলৰ সংগীত-চিন্তাৰ সম্পূৰ্ণ বিপৰীত (চিনেমা খন চোৱাৰ সময়ত আমাৰ মনলৈ আহিছিল-- নীড়-ৰাউল "জুবিন গাৰ্গ"ৰ দুটা "সংগীত-চিন্তা" বুলি ভাবিব পাৰোঁ নেকি!)। স্বাভাৱিকতে সংঘাত হয়। আৰু সংঘাতে কাহিনীক গতি দিয়াত সহায় কৰে। (কাহিনী প্ৰসংগ ইমানতে এৰিলোঁ। কাহিনীৰ গতিয়ে মনলৈ আনি দিয়া প্ৰশ্ন-- পৰিচালকে সম্পাদনাত আৰু পৰিশ্ৰম কৰিব লাগিছিল নেকি? জুবিনৰ অবৰ্তমানত পৰিচালকে "জুবিনৰ চিনে-চিন্তা"ক পৰ্দালৈ নিয়াত আপোচ কৰিলে নেকি বা কৰিবলৈ বাধ্য হ'ল নেকি? কোনোবা খিনিত আধৰুৱা হ'ল নেকি?) কাহিনীৰ গতি মসৃন বা ছান্দিক বুলিব নোৱাৰি। সংগীত, সংলাপ প্ৰয়োগৰ ইতিবাচক দিশৰ বিপৰীত চিনেমা খনৰ কাহিনীৰ গতি। (আৰু আছে)
সংযোজন:
চিনেমা খনৰ বাজেট: ৪ কোটি টকা।
চিনেমা খন প্ৰথম পৰ্যায়ত দেশৰ ১৪৩টা চিত্ৰগৃহত (দৈনিক ৬৬৪ দৰ্শনী) মুক্তি দিয়া হৈছে। প্ৰথম পৰ্যায়ত অসমৰ ৫৩টা চিত্ৰগৃহত (দৈনিক ৪৩১টা দৰ্শনী),
প্ৰথম পৰ্যায়ত অসমৰ বাহিৰৰ ৯০টা চিত্ৰগৃহত (দৈনিক ২৩৪ টা দৰ্শনী)।
প্ৰথমটো দৰ্শনী আৰম্ভ হৈছিল পুৱা ৪.২৫ বজাত, গুৱাহাটীৰ বেলতলাত।
চিনেমা খনৰ প্ৰথম দিনটোৰ সংগ্ৰহ ২.৫২ কোটি টকা।
--এয়া অসমীয়া চিনেমাৰ "বজাৰ অভিলেখ।
মন্তব্যসমূহ
একটি মন্তব্য পোস্ট করুন