-- এনেদৰে ফিল্মী ষ্টাইলত তামিলনাডুৰ নৱম মুখ্যমন্ত্ৰী হিচাপে শপত গ্ৰহণ কৰিলে থলপতি বিজয়ে। ( তামিল শব্দ থলপতি মানে অধিনায়ক।) (প্ৰকৃত নাম) জোচেফ বিজয় চন্দ্ৰশেখৰে। --এয়া নতুন কথা নহয়। দক্ষিণ ভাৰতীয় ৰাজনীতিৰ সুদীৰ্ঘ ইতিহাসত মুখ্যমন্ত্ৰীৰ আসনত "ৰূপালী তাৰকা" বহা খবৰটো। --হয়, নতুন নহয়; কিন্তু প্ৰতিটো নতুন অধ্যায়ৰ লগতে নতুনকৈ প্ৰশ্ন উত্থাপিত হয়-- গণতান্ত্ৰিক ৰাজনীতিত "জনপ্রিয় সংস্কৃতি"ৰ শক্তি কিমান গভীৰ?
ৰাজনীতিত "তামিল চিনেমা"ৰ যাত্ৰা আৰাম্ভ কৰিছিল এম. জি. ৰামচন্দ্রনে। ৰূপালী গল্পত দুখীয়াৰ ত্ৰাণকৰ্তা, অন্যায়ৰ বিৰুদ্ধে যুঁজ দিয়া "নায়ক" আৰু জনতাৰ বন্ধু হিচাপে গঢ়ি উঠা তেওঁৰ প্ৰতিচ্ছবি ধীৰে ধীৰে বাস্তৱ ৰাজনীতিতো-- বিশাল জনআৱেগলৈ ৰূপান্তৰিত হৈছিল। জনসাধাৰণে "নায়ক" আৰু "ৰাজনীতিক" গৰাকীৰ মাজত পৃথক সীমাৰেখা অনুভৱ কৰা নাছিল।
পৰ্দাৰ "নায়ক", বাস্তৱৰো "উদ্ধাৰকর্তা" --এই ধাৰণা অধিক শক্তিশালী কৰিছিল "অম্মা" জয়ৰাম জয়ললিতাই। প্ৰায় ৩৪ বছৰ সক্ৰিয় ৰাজনীতি থকা নেত্ৰী গৰাকী প্ৰায় ১৪ বছৰ তমিলনাডুৰ মুখ্যমন্ত্ৰী আছিল। (এই সময়ছোৱাত তেওঁ বহু জনকল্যাণমূলক আঁচনি আৰম্ভ কৰিছিল আৰু “অম্মা” ব্ৰেণ্ডৰ বিভিন্ন সমাজকল্যাণমূলক প্ৰকল্প বিশেষ জনপ্ৰিয় হৈছিল।) অভিনেত্ৰীৰ পৰা ৰাজ্যৰ অন্যতম প্ৰভাৱশালী মুখ্যমন্ত্ৰীলৈ তেওঁৰ উত্তৰণে স্পষ্ট কৰিছিল-- চিনেমাৰ পৃথিৱী খনত গঢ়ি উঠা মোহনীয় ব্যক্তিত্ব বহু সময়ত ৰাজনৈতিক কৰ্তৃত্বলৈ ৰূপান্তৰিত হ’ব পাৰে!
পৰৱৰ্তী সময়ত একে বাটে আগবাঢ়িছিল-- নন্দামুৰি তাৰকা ৰামা ৰাও। এন টি ৰামা ৰাও। এগৰাকী কিংবদন্তী তেলুগু অভিনেতা। তেলুগু দেশম পার্টিৰ প্ৰতিষ্ঠাপক। দক্ষিণ ভাৰতৰ আঞ্চলিক ৰাজনীতিত "যুগান্তকাৰী" নেতা বুলি গণ্য কৰা হয়। প্ৰায় ৭ বছৰ অন্ধ্রপ্রদেশেৰ মুখ্যমন্ত্ৰী আছিল। উল্লেখ্য দিশ-- ৰাজনীতিত "তেলুগু আত্মসম্মান"ৰ প্ৰতীক হিচাপে আত্মপ্ৰকাশ কৰা এন টি আৰে কাৰ্যত দেখুৱাইছিল--
"আঞ্চলিক পৰিচয়" আৰু "চিনেমাৰ জনপ্ৰিয়তা" একেলগে মিলিলে ৰাজনীতিৰ ভিতৰতো এক অসাধাৰণ ৰাজনৈতিক শক্তি গঢ়ি তুলিব পাৰি।
"ৰূপালী জগত"ৰ পৰা ৰাজনীতিলৈ অহা আন এক নাম-- মুথুভেল কৰুণানিধি। মূলতঃ চিত্ৰনাট্যকাৰ আৰু চিনেমাৰ-সংলাপ লেখক আছিল। পাছত মুখ্যমন্ত্ৰীৰ আসনত বহে।
১৯৪০-৫০ দশকত তামিল চিনেমাক ৰাজনৈতিক আৰু সামাজিক মতাদৰ্শৰ বাহন হিচাপে ব্যৱহাৰ কৰা হৈছিল। এই আন্দোলনৰ অন্যতম মুখ আছিল এম কৰুণানিধি। চিনেমা সমালোচক সকলৰ ব্যাখ্যাত স্পষ্ট-- কৰুণানিধিৰ সংলাপসমূহ তীক্ষ্ণ, আৱেগঘন আৰু সমাজসচেতনতাৰ বাবে বিশেষভাৱে জনপ্ৰিয় হৈছিল। বিশেষকৈ দ্রাবিড় আন্দোলনৰ সামাজিক ন্যায়, বৰ্ণবৈষম্যবিৰোধী চিন্তা আৰু তামিল জাতীয়তাবোধ তেওঁৰ লেখাত স্পষ্টভাৱে প্ৰতিফলিত হৈছিল। উল্লেখ্য চিনেমা: পৰশক্তি, মনোহৰা, পুম্পুহাৰ আদি। ইয়াৰে "পৰশক্তি"ৰ সংলাপে তামিল সমাজত বিপুল আলোড়ন তুলিছিল।
--১৯৬৯ চনত কনজীৱৰাম নটৰাজন আন্নাদুৰাই (চি এন আন্নাদুৰাই) -ৰ মৃত্যুৰ পাছত কৰুণানিধি
প্ৰথমবাৰৰ বাবে তামিলনাডুৰ মুখ্যমন্ত্ৰী হয়। আৰু তাৰ পাছত তেওঁ মুঠ পাঁচবাৰ মুখ্যমন্ত্ৰীৰ দায়িত্ব পালন কৰে। এই গৰাকী (ডিএমকে-ৰ) "ৰাইজৰ নেতা"ৰ ৰাজনৈতিক লক্ষ্য-- তামিল ভাষা আৰু সংস্কৃতিৰ সুৰক্ষা, সামাজিক ন্যায়ৰ পক্ষে অবস্থান, পিছপৰা শ্ৰেণীৰ অধিকাৰ, কেন্দ্ৰীয় "হিন্দি চাপ"ৰ বিৰুদ্ধে আঞ্চলিক আত্মপৰিচয়ৰ ৰাজনীতি।
১৯৭০ দশকৰ শেষভাগৰ পৰা ২০০০ দশকলৈকে তেওঁ তামিল বাণিজ্যিক চিনেমাৰ তাৰকা আছিল-- বিজয়ৰাজ। সম্পূৰ্ণ নাম-- বিজয়ৰাজ আলাগৰস্বামী নাইডু। একচনধর্মী চৰিত্ৰ, সামাজিক ন্যায়ৰ পক্ষে সংলাপে কৈ "জনতাৰ নায়ক" ইমেজ লৈ ডি এম ডি কে দল প্ৰতিষ্ঠা কৰিছিল। ২০০৫ চনত গঠন কৰা (ডি এম ডি কে) "Desiya Murpokku Dravida Kazhagam" নামৰ অৰ্থ-- "জাতীয় প্ৰগতিশীল দ্রাবিড় সংঘ"। এই দলটোৰ বেনাৰত "আভিনেতা-নেতা" গৰাকীয়ে সক্ৰিয় ৰাজনীতিত প্ৰায় ১৮ বছৰ জড়িত আছিল।
--আন এগৰাকী তেলেগু "তাৰকা" কনিডেলা শিৱশংকৰ বৰাপ্ৰসাদ। চিৰঞ্জীৱী। ৰাজনীৰ বাটত খোজ দিছিল; কিন্তু আঁতৰি আহিল। ২০০৮ চনত সক্ৰিয়ভাৱে ৰাজনীতিত প্ৰৱেশ কৰি। তেওঁ আন্ধ্ৰপ্ৰদেশত পি আৰ পি (Praja Rajyam Party)
নামৰ এটা আঞ্চলিক ৰাজনৈতিক দল গঠন কৰিছিল। দলটোৰ মূল লক্ষ্য আছিল সামাজিক ন্যায়, দুৰ্নীতি বিৰোধী ৰাজনীতি আৰু বিকল্প নেতৃত্ব গঢ়ি তোলা। ২০০৯ চনৰ আন্ধ্ৰপ্ৰদেশ বিধানসভা নিৰ্বাচনত দলটোৱে যথেষ্ট ভোট লাভ কৰিছিল যদিও ক্ষমতালৈ আহিব নোৱাৰিলে। পাছত ২০১১ চনত দলটো ভাৰতীয় জাতীয় কংগ্ৰেছত বিলীন হয়। ২০১২ চনত তেওঁ ভাৰত চৰকাৰৰ পৰ্যটন মন্ত্ৰী হিচাপে দায়িত্ব পালনো কৰিছিল। কিন্তু পৰৱৰ্তী সময়ত পুনৰ চিনেমাত অধিক সক্ৰিয় হৈ পৰে।
দক্ষিণ ভাৰতৰ আন এগৰাকী জনপ্ৰিয়, দক্ষ অভিনেতা-পৰিচালক কমল হাচান ২০১৮ চনত প্ৰতিষ্ঠা কৰিছিল-- এম.এন.এম. (Makkal Needhi Maiam)। এটা আঞ্চলিক ৰাজনৈতিক শক্তি। ডি.এম.কে. আৰু এ.আই.ডি.এম.কে. -ৰ "তৃতীয় বিকল্প" হিচাপে। কিন্তু অভিনেতা গৰাকীয়ে "পৰ্দা"ৰ জনপ্ৰিয়াত "ৰাজনীতি"লৈ নিব নোৱাৰিলে। (ছপামাধ্যমত: বসুন্ধৰা/ দৈনিক জনমভূমি ২৪/০৫/২০২৬)
--উৎপল মেনাউৎপল মেনা
মন্তব্যসমূহ
একটি মন্তব্য পোস্ট করুন