২০২৪: জ্যোতিৰ বাটেৰে ৰূপালী খোজ
--উৎপল মেনা
(অসমীয়া_খবৰ প্ৰথম পৃষ্ঠাত ১/১/২০২৪)
কেৱল জ্যোতি চিত্ৰবনতে নহয়, ভিন্ন প্ৰান্তত, ভিন্ন পৰ্যায়ত আছে কেইবাখনো অসমীয়া চিনেমা।
'ইন্দ্ৰ-মালতী'ৰ বাটটো পৰৱৰ্তী সময়ত বহল কৰিছিল ব্ৰজেন বৰুৱা, নিপ বৰুৱা,
শিৱ প্ৰসাদ ঠাকুৰই। পাছত অসমীয়া চিনেমাৰ এই ধাৰাক গতি দিছিল মুনিন বৰুৱাই। সুখকৰ বিষয়-- মুনিন বৰুৱাৰ কায়িক অৱৰ্তমানতো চলি আছে "মুনিন বৰুৱাৰ চিনেমা"ৰ কাম। জনপ্ৰিয় পৰিচালক গৰাকীৰ কাহিনী-চিত্ৰনাট্যৰে নিৰ্মাণ হৈ আছে দুখনকৈ চিনেমা--"বাৰুদ-২" আৰু "পথ-উপপথ"। মানস বৰুৱাৰ পৰিচালনাৰে নিৰ্মাণ হৈ থকা "পথ-উপপথ" চিত্ৰগৃহলৈ আহিব নতুন বছৰটোৰ ছেপ্টেম্বৰ মাহত। তাৰ পাছতে মানস বৰুৱাই ফ্ল'ৰলৈ নিব-- "বাৰুদ-২" (-হয়, ১৪ এপ্ৰিল, ২০০৪ -ত চিত্ৰগৃহলৈ অহা "বাৰুদ"ৰ ছিকুৱেল।)। এই খিনিতে উল্লেখ কৰিব পাৰি, আৰু এখন অসমীয়া চিনেমা ২০২৪ বৰ্ষটোত ফ্ল'ৰলৈ যোৱাৰ আশা আছে, যি খন চিনেমাৰ বিষয়বস্তু "মুনিন বৰুৱা"। চিনেমা খনৰ নাম "ভাইমন"।
অসমীয়া চিনেমাৰ বাণিজ্যিক গতি দ্ৰুত কৰিছিল জুবিন গাৰ্গে। স্বাভাৱিকতে জুৱিনৰ চিনেমাৰ অপেক্ষাত থাকে একাংশ দৰ্শক। বিশেষকৈ এই প্ৰজন্মৰ দৰ্শক। পৰিচালনাৰ বাবে এখনো চিনেমা হাতত লোৱা নাই যদিও বছৰতোত দুখন চিনেমাত দেখা যাব জুবিনক, দেবাংকৰ বৰগোঁহায়ৰ পৰিচালনাৰে নিৰ্মণ হৈ থকা "চিকাৰ" আৰু জয়ন্ত নাথৰ পৰিচালনাৰে নিৰ্মিত "ৱাইড এংগোল"ত। জুবিন গাৰ্গৰ ঘৰুৱা প্ৰডাকচনৰ চিনেমা এখনো বছৰটোত চিত্ৰগৃহলৈ যাব-- "ৰৈ ৰৈ বিনালে"। পৰিচালনা কৰিব ৰাজেশ ভূঞাই।
জুবিনে কটা অসমীয়া চিনেমাৰ বানিজ্যিক বাট পৰৱৰ্তী সময়ত বহল কৰিছিল ক্ৰমে যতীন বৰা (ৰত্নাকৰ), সুব্ৰত কাকতিয়ে (শ্ৰী ৰঘুপতি)। "শ্ৰী ৰঘুপতি" ৰ হাইলাইট আছিল চিনেমা খনৰ নায়ক ৰবি শৰ্মা। গতিকে স্বাভাৱিকতে দৰ্শকৰ আগ্ৰহ বাঢ়িছে ৰবিৰ চিনেমাৰ প্ৰতি। নতুন বছৰটোৰ শেষৰ ফালে অভিনেতা-লেখক গৰাকীয়ে নিজৰ চিনেচিন্তাৰে চিনেমা এখনৰ কাম আৰম্ভ কৰিব।ৰবিয়ে অভিনয় কৰিব লগীয়া আন এখন চিনেমা "ৰুদ্ৰ"(পৰিচালক: ৰূপক গগৈ) নতুন বছৰটোত চিত্ৰগৃহলৈ আহিব।
১৯৯৮ চন। --সেই সময়ত অসমীয়া চিনেমাৰ স্থানীয় বজাৰৰ দিন-কাল অতি বেয়া আছিল। কেইবা খনো অসমীয়া চিনেমাৰ ব্যৱসায়িক বিফলতাৰ পাছত "ছুপাৰহিট" হৈছিল সেই সময়ৰ এগৰাকী নৱাগত পৰিচালকৰ চিনেমা। চিনেমা খনৰ নাম-- যৌৱনে আমনি কৰে"। সেই চিনেমা খনৰ পৰিচালক অশোক কুমাৰ বিষয়াই হাতত লৈছে "যৌৱনে আমনি কৰে-২"ৰ কাম। এই ছিকুৱেল খনো চিত্ৰগৃহলৈ আহিব নতুন বছৰটোত। ২০২৪ বৰ্ষটোত চিত্ৰগৃহলৈ আহিব লগীয়া অসমীয়া চিনেমাৰ তালিকাত আছ-- "এটা নিৰ্জন দুপৰীয়া" (পৰিচালক: খঞ্জন কিশোৰ নাথ),
"দুৰ্গা- দি ৱাৰিয়ৰ" আৰু "প্ৰতিশ্ৰুতি" (পৰিচালক: কিশোৰ তহবিলদাৰ), "লোকেল কুংফু-৩" আৰু "জিয়া" (পৰিচালক: কেনী বসুমতাৰী), 'মহাবাহু ব্ৰহ্মপুত্ৰ" (পৰিচালক: প্ৰাঞ্জল প্ৰতিম চেতিয়া), "ৰক্ষক" (পৰিচিলক: ৰুবুল দাস), আদি।
অসমীয়া চিনেমাৰ "স্থানীয় বজাৰ"ক গতি দিয়াৰ ক্ষমতা থকা দুগৰাকী পৰিচিলক-- হিমাংশু প্ৰসাদ দাস,
অচিন্ত শংকৰ। বজাৰ চিন্তাৰ লগতে নতুন নতুন চিনেচিন্তাৰে চিনেকৰ্ম কৰি অহা হিমাংশু প্ৰসাদ দাসৰ "জয় হনুমেন" চিত্ৰগৃহলৈ আহিব নতুন বছৰটোত। আন গৰাকী পৰিচালক অচিন্তৰ পৰিচালনাৰে এখন শিশু চিনেমা "হোমৱ'ৰ্ক"ৰ নিৰ্মাণ কৰ্ম শেষ হৈছে। পৰিচালক গৰাকীয়ে আন এখন নতুন চিনেমা "অভিমন্যু" ফ্ল'ৰলৈ নিব নতুন বছৰটোৰ প্ৰথমটো মাহত।
গল্প চিত্ৰায়ণৰ শৈলী, সংলাপ প্ৰয়োগ, চৰিত্ৰ নিৰ্মাণ শৈলীৰে অসমীয়া চিনেমাৰ নতুন বাট কাটিছিল ড°ভৱেন্দ্ৰ নাথ শইকীয়াই। পৰৱৰ্তী সময়ত এই শৈলীৰে "কেলেণ্ডাৰ" নামেৰে ৰূপালী গল্প নিৰ্মাণ কৰিছিল হিমজ্যোতি তালুকদাৰে। এই গৰাকী পৰিচালকৰ শেহতীয়া চিনেমা "তাৰিখ"। চিত্ৰগৃহলৈ আহিব নতুন বছৰটোত। উল্লেখ্য যে হিমজ্যোতিয়ে নতুন বছৰটোত ড°ভৱেন্দ্ৰনাথ শইকীয়াৰ "মৰমৰ দেউতা"ক ৰূপালী গল্পলৈ ৰূপান্তৰ কৰিব।
অসম আন্দোলনক (১৯৭৯ চনৰ পৰা ১৯৮৫ চনলৈকে অবৈধ অনুপ্ৰবেশকাৰীসকলৰ বিৰুদ্ধে কৰা অসমীয়া মানুহৰ আন্দোলন।) কেন্দ্ৰ কৰি হেম চন্দ্ৰ বৰাই পৰিচালনা কৰিছিল এখন অসমীয়া চিনেমা "সংকল্প"। চিত্ৰগৃহত মুক্তি পাইছিল ১৯৮৬ চনত। প্ৰায় ৩৭ বছৰ পাছত পৰিচালক গৰাকীয়ে দ্বিতীয় খন পূৰ্ণদৈৰ্ঘৰ চিনেমাৰ কাম হাতত লৈছে, "ঝংকাৰ" নামেৰে। এই চিনেমা খনো নতুন বছৰটোত চিত্ৰগৃহলৈ আহিব।
বজাৰচিন্তাৰ আঁতৰত থাকি নতুন নতুন চিনেচিন্তাৰে চিনেকৰ্ম কৰি থকা "হান্দুক" খ্যাত জয়ছেং জয় দহোতীয়াৰ "বাঘজান" নতুন বৰ্ষটোত চিত্ৰগৃহলৈ আহিব লগীয়া আন এখন চিনেমা।
বজাৰচিন্তাৰে, চিনেশিল্পৰ বাবে চিনেকৰ্ম কৰা পৰিচালক যদুমণি দত্তই প্ৰায় ৯ বছৰৰ পাছত এখন অসমীয়া চিনেমাৰ কাম শেষ কৰিলে প্ৰচাৰ মাধ্যমৰ পৰা আঁতৰত থাকি। নাম স্থিৰ নহোৱা এই চিনেমা খনো চিত্ৰগৃহলৈ আহিব নতুন বছৰটোত। উল্লেখ কৰা এই কেইখনৰ লগতে ভিন্ন পৰ্যায়ত আছে ৩০-৪০ খন অসমীয়া চিনেমা। ইয়াৰে ৫খনৰ সৈতে জৰিত হৈ আছে প্রতিভাবান চিনেকৰ্মী ঝুলন কৃষ্ণ মহন্ত-- "গোসাঁইঘৰত আউল" (কাহিনী - চিত্ৰনাট্য, পৰিচালনা আৰু সম্পাদনা), "সন্ধ্যামালতি, এতিয়াও সাৰে আছে তাই" (কাহিনী, পৰিচালনা আৰু সম্পাদনা), সঞ্জীৱ হাজৰিকাৰ "বকুল ফুলৰ দৰে" (সম্পাদনা), উপাসনা মহন্তৰ "গেং অব ৰাজুমামা" (কাহিনী, চিত্ৰনাট্য আৰু সম্পাদনা), জুল্ফিকাৰ পাৰভেজৰ "তেজপাত" (সম্পাদনা)। --সন্দেহ নাই ভিন্ন পৰ্যায়ত থকা এই চিনেমাৰ মাজৰ কেইবা খনেও যে সফলতাৰ, নতুন চিনেচিন্তাৰ বাট কাটিব।
|| অতীত-চাৰণ ||
২০২৩বৰ্ষটোত চিত্ৰগৃহলৈ অহা দ্বিতীয় খন অসমীয়া চিনেমা "জয়মতী" বাটৰ এটি খোজ। পৰিচালনা শৈলী "বজাৰ চিন্তা" মুক্ত যদিও স্থানীয় বজাৰত (চিনেমাৰ বজাৰৰ ভাষাত) "চেমি হিট"। প্ৰায় ৬০ লাখ টকাৰ বাজেটৰ চিনেমা খনে হয়তো আৰু কিছু "বজাৰ" পালে হেতেন, যদিহে "ডক্তৰ বেজবৰুৱা-২" প্ৰচাৰ ধুমুহাৰে ৩ফেব্ৰুৱাৰী তাৰিখে চিত্ৰগৃহলৈ নাহিল হেতেন। "ডক্তৰ বেজবৰুৱা-২" বছৰটোত মুক্তি পোৱা তৃতীয় খন অসমীয়া চিনেমা। দ্বিতীয় খন-- "অনুৰ"। মঞ্জুল বৰুৱাৰ পৰিচালনা। এই চিনেমা খনৰ প্ৰধান অলংকাৰ ডাঃ জাহানাৰা বেগমক লৈ নিৰ্মাণ কৰা কেন্দ্ৰীয় চৰিত্ৰটো। পৰিপাটি অভিনয়ৰ বাবে ডাঃ বেগমক ৬৯ সংখ্যক ৰাষ্ট্ৰীয় চলচ্চিত্ৰ বঁটাৰ জুৰীয়ে বিশেষ স্বীকৃতি প্ৰদান কৰে। আৰু চিনেমা খনলৈ ৰাষ্ট্ৰীয় বঁটা আহে শ্ৰেষ্ঠ অসমীয়া চিনেমাৰ শিতানত।
বৰ্ষটোত চিত্ৰগৃহলৈ অহা আন কেইখন "স্বতন্ত্ৰ" অসমীয়া চিনেমা--"কমলা কুঁৱৰী" (পৰিচালক: পৰমানন্দ ৰাজবংশী, চিত্ৰগৃহলৈ: ৬ জানুৱাৰী), "কৃষ্ণলীলা" (পৰিচালক: ড° ৰুক্মিণী বৰা, চিত্ৰগৃহলৈ: ৩ মাৰ্চ), "the consequences (পৰিচালক: চন্দ্ৰ শেখৰ দাস, চিত্ৰগৃহলৈ: ২৬ মে'), tora's husband (পৰিচালক: ৰীমা দাস, চিত্ৰগৃহলৈ: ২২ ছেপ্টেম্বৰ।), "মমতাৰ চিঠি" (পৰিচালক: নিৰ্মল দাস, চিত্ৰগৃহলৈ: ৬ অক্টোবৰ।), "নেলীৰ কথা" (পৰিচালক: পাৰ্থজিৎ বৰুৱা, চিত্ৰগৃহলৈ: ৮ ডিচেম্বৰ।) ইয়াৰে দেশ-বিদেশৰ চলচ্চিত্ৰ মহোৎসৱত চিত্ৰৰসিকক সন্তুষ্ট কৰা (টৰণ্টো আন্তৰ্জাতিক চলচ্চিত্ৰ মহোৎসৱ, বুছান আন্তৰ্জাতিক চলচ্চিত্ৰ মহোৎসৱ, বেংকক বিশ্ব চলচ্চিত্ৰ মহোৎসৱ,
হাইনান দ্বীপ আন্তৰ্জাতিক চলচ্চিত্ৰ মহোৎসৱ, কলকাতা আন্তঃৰাষ্ট্ৰীয় চলচ্চিত্ৰ মহোৎসৱ আদিত)
"তৰা'ছ হাজবেণ্ড"-এ স্থানীয় বজাৰত মধ্যমিয়া ব্যৱসায় কৰাৰ বিপৰীতে আন কেইখনৰ ব্যৱসায়-- সাধাৰণ। উল্লেখ্য যে "মমতাৰ চিঠি" (হেম বৰুৱাৰ একে নামৰ কবিতাৰ) কবিতাৰ আধাৰত নিৰ্মাণ কৰা প্ৰথম খন পূৰ্ণদৈৰ্ঘৰ অসমীয়া চিনেমা।
আহিছো বজাৰ কেন্দ্ৰীক চিন্তাৰে নিৰ্মাণ কৰা অসমীয়া চিনেমালৈ। বছৰটোত চিত্ৰগৃহলৈ আহিছিল-- "ডক্তৰ বেজবৰুৱা ২" (পৰিচালক: নিপন গোস্বামী, চিত্ৰগৃগলৈ: ৩ফেব্ৰুৱাৰী), "ব্লেক এণ্ড হোৱাইট" (পৰিচালক: ধনজিৎ দাস, চিত্ৰগৃহলৈ: ২৪ ফেব্ৰুৱাৰী), "দিছপুৰত গাভৰু" (পৰিচালক: এম এম ৰহমান, আসীম বৈশ্য, চিত্ৰগৃহলৈ: ৩মাৰ্চ), "অৰ্জুন" (পৰিচালক:ৰজনী বৰ্মন,চিত্ৰগৃহলৈ: ৭ এপ্ৰিল), " কি কোৱা দোস্তি" (পৰিচালক: কেনী বসুমতাৰী, চিত্ৰগৃহলৈ: ২৮ এপ্ৰিল), "শ্ৰী ৰঘুপতি" (পৰিচালক: সুব্ৰত কাকতি, চিত্ৰগৃহলৈ ৫জুন), "দ্য শ্লেমবুক" (পৰিচালক: প্ৰাঞ্জল গৈয়াৰী, চিত্ৰগৃহলৈ: ৩০ জুন), "এটি নক্ষত্ৰ" (পৰিচালক: ৰুদ্ৰজিৎ মজুমদাৰ, চিত্ৰগৃহলৈ : ৬ অক্টোবৰ), "বীৰ" (পৰিচালক: নাৰায়ণ শীল, চিত্ৰগৃহলৈ: ১১ অক্টোবৰ), "ৰাঘৱ" (পৰিচালনা: যতীন বৰা চিত্ৰগৃহলৈ: ২৭ অক্টোবৰ), "ৰঙাটাপু-১৯৮২" (পৰিচালক: আদিত্যম শইকীয়া, চিত্ৰগৃহলৈ: ২৪ নৱেম্বৰ)।
অসমীয়া চিনেমাৰ শুদ্ধ, স্পষ্ট box office collection report পোৱা নাযায়। বিভিন্ন উৎসৰ পৰা পোৱা তথ্য: প্ৰায় ২ কোটি টকা বাজেটৰ "ডাক্তৰ বেজবৰুৱা"ৰ collection ৫.৫ কোটি টকা, প্ৰায় ২ কোটি টকা বাজেটৰ "শ্ৰী ৰঘুপতি"ৰ collection ১৩.৮১ কোটি টকা। ১কোটি টকা বাজেটৰ "ৰঙাটাপু-১৯৮২"ৰ লগতে "কি কোৱা দোস্তি"ৰ স্থানীয় বজাৰত ব্যৱসায় সন্তোষজনক। আনকেইখনৰ-- সাধাৰণ। বছৰটোত অসমীয়া চিনেমাৰ বজাৰৰ ক্ষতি-- যতীন বৰাৰ "ৰাঘৱ"ৰ সাধাৰণ ব্যৱসায়। প্ৰায় ২.৩ কোটি টকা বাজেটৰ চিনেমা খনৰ প্ৰযোজকে বিনিয়োগ কৰা টকা খিনিহে স্থানীয় বজাৰৰৰ পৰা আহৰণ কৰিছে। উল্লেখ্য যে যতীন বৰাৰ "ৰত্নাকৰ"ৰ collection আছিল ৯,৪৮,১৬,২৬০ টকা (100 rupees in 2019 are equivalent to 126.27
rupees in 2023.)। এই সংখ্যা চলিত বৰ্ষত অতিক্ৰম কৰিলে "শ্ৰী ৰঘুপতি"য়ে। এই যে অতিক্ৰম কৰিলে, এয়া আশাৰ বতৰা। অসমীয়া চিনেমাৰ স্থানীয় বজাৰৰ ইতিবাচক বতৰা। তেনেদৰে ইতিবাচক খবৰ-- বছৰটোত "অসমীয়া চিনেমা"ই চন্দ্ৰ শেখৰ দাস, সুব্ৰত কাকতি, ৰুদ্ৰজিৎ মজুমদাৰ, নিৰ্মল দাস, আদিত্যম শইকীয়া নামেৰে নতুন পৰিচালক পালে, যাৰ পৰা আশা কৰিব পাৰোঁ-- নতুন চিনেচিন্তাৰ নতুন চিনেকৰ্ম।
২০২৩ বৰ্ষটোৰ আন তিনিখন অসমীয়া চিনেমা -- প্ৰদ্যুৎ কুমাৰ ডেকাৰ পৰিচালনাৰে নিৰ্মিত-- "The Government Servant", কেনী বসুমতাৰীৰ পৰিচালনাৰে নিৰ্মিত-- "জিয়া"। চিত্ৰগৃহত মুক্তি দিয়া নাই। চলিত বৰ্ষটোত চিত্ৰগৃহত মুক্তি নিদিয়া আন এখন অসমীয়া চিনেমা "অনুনাদ"। ৰীমা বৰাৰ পৰিচালনাৰে অসম চলচ্চিত্ৰ নিগম লিমেটডে নিৰ্মাণ কৰা এই চিনেমা খনে লাভ কৰিছে ৬৯ সংখ্যক ৰাষ্ট্ৰীয় চলচ্চিত্ৰ বঁটা, সামাজিক বিষয়ৰ শ্ৰেষ্ঠ ছবিৰ শিতানত।
মন্তব্যসমূহ
একটি মন্তব্য পোস্ট করুন