জিয়া/ চিনেচৰ্চা

চিনেমা খনৰ নাম-- "জিয়া"। মূল চৰিত্ৰটোৰ নাম-- জিয়া। কেনী বসুমতাৰীৰ পৰিচালনা। প্ৰথম কথা-- কেনী বসুমতাৰী জনপ্ৰিয় "লোকেল কুংফু"ৰে ("লোকেল কুংফু"ৰ পাছত "লোকেল কুংফু-২" পৰিচালনা কৰিছে। স্থানীয় বজাৰত সফল হৈছে। "লোকেল কুংফু-৩" পৰিচালনাৰ কাম হাতত লৈছে।)। এই "জনপ্ৰিয় শৈলী"ৰ পৰা আঁতৰত "জিয়া"ৰ পৰিচালনা শৈলী। জিয়া চিনেমা খনৰ কাহিনীৰ মূল বিন্দু। কাহিনীৰ গতি সৰল ৰৈখিক। কাহিনী আমাৰ সমাজ খনৰে। ঘৰুৱা হিংসাৰ বাবে স্বামীৰ পৰা পৃথক হোৱা এগৰাকী নাৰী--জিয়া। পৰিচালকে গুৰুত্ব দিছে অকলশৰীয়া "মাতৃ জিয়া"ৰ জীৱন বাটৰ সংগ্ৰামত। 

এক মাত্ৰ কিশোৰী সন্তানক পিতৃ লাগে। স্বামীৰ সৈতে নথকা জিয়াক সমাজৰ বহুতে অন্য ধৰণে লয়। এই বোৰ "সমস্য"ৰ পৰা মুক্ত হও বুলিয়ে জিয়াই আকৌ বিয়াৰ কথা মনলৈ আনে। জীৱনলৈ এক পুৰুষ আহে। কিন্তু আকৌ জিয়াই জীৱন বাটত উজুটি খায়। আকৌ এবাৰ মুখাৰ আঁৰৰ মুখে জিয়াক কষ্ট দিয়ে। শেষত-- জিয়াই একমাত্ৰ সন্তানৰ সৈতে জীৱনৰ বাট বুলাৰ সিদ্ধান্ত লয়। 

চিনেমা খনৰ এটা ভাল লগা বা ইতিবাচক দিশ--চৰিত্ৰ বিন্যাস, কাহিনী বিন্যাস। কাহিনীৰ গতিত চৰিত্ৰ বিন্যাস। কাহিনীৰ গতিত এৰি যোৱা চৰিত্ৰটোও স্পষ্ট কৰি গৈছে, কম ফুটেজত, সাহিত্যৰ ভাষাক গুৰুত্ব দি। "জিয়া"ক পৰিপাটিকৈ ক্ৰমে দৰ্শকৰ ওচৰত স্পষ্ট কৰি গৈছে। জিয়াৰ লগতে প্ৰতিটো চৰিত্ৰ নিৰ্মাণ কৰিছে বাস্তৱ বা চিনেমেটিক অভিনয়ৰে। আভিনয়ে নহয়, চৰিত্ৰ বোৰৰ চিন্তা, কথা-বতৰা বোৰো বাস্তৱ। জিয়াৰ মাকে তেনেদৰেই ভাৱে, আমাৰ সমজৰ নব্বৈ শতাংশ বিবাহ বিচ্ছেদ মহিলাৰ মাতৃয়ে যেনেদৰে ভাবিব পাৰে! ঠিক  তেনেদৰে জিয়াৰ পিতৃ, বান্ধৱী  আদিকো "বাস্তৱ চৰিত্ৰৰ বৃত্ত" ৰ বাহিৰলৈ যাব দিয়া নাই। 

কাহিনীৰ গতিত জীয়াৰ জিয়াৰ মানসিক স্থিতি মাত্ৰ এটা সংলাপতে স্পষ্ট কৰিছে। জিয়াই যে অস্থিৰতাৰ মাজত থাকিয়ো স্থিৰ, স্থিৰতাৰ মাজত অনুভৱ কৰিব নোৱাৰি, তাই যে sleeping tablet ব্যৱহাৰ কৰে। জিয়াৰ জীৱনলৈ অহা দ্বিতীয় গৰাকী পুৰুষৰ অনুভৱৰ উত্তৰত মাত্ৰ দুটা বাক্য: মুখা পিন্ধি আছোঁ, আমি সকলোৱে। তুমিয়ো কিজানি মুখা পিন্ধিয়ে আছা! বিশ্বাসৰ মাজতো আবিশ্বাস মনত লৈ জিয়াৰ যাত্ৰা। এই ছিকুৱেন্সটোই কাহিনীৰ পৰিনতিৰ বিশ্বাস যোগ্যতা বঢ়াইছে। পৰিচিলক-চিত্ৰনাট্যকাৰৰ পৈনত চিনেচিন্তা স্পষ্ট কৰিছে।

--চিনেমা খনৰ মূল সৌন্দৰ্য জিয়াৰ চৰিত্ৰত অভিনয় কৰা শৰ্মিষ্ঠা চক্ৰৱৰ্তীৰ অভিনয় আৰু সংগীত। ৰিকি শৰ্মা,ইপ্সিতা হাজৰিকা, আৰাধ্যা মহন্ত আদিৰ অভিনয়ো চিনেমেটিক। 

--চিনেমা খনৰ ভাল নলগা দিশ কাহিনীৰ গতিত মাজে মাজে "কেমেৰাৰ ভাষা সাহিত্যৰ ভাষাৰ বহতীয়া হৈ  পৰিছে"।