"Who is Dipen Baruah?" --কোনে কৰিছে এই প্ৰশ্ন?
"জুবিন গাৰ্গ"ৰ একাং অনুৰাগীয়ে।
--কিয়?
৭ ডিচেম্বৰ, ২০২২-ৰ নিশা এক সংগীত অনুষ্ঠানত ভালেমান চিৰসেউজ অসমীয়া গীতৰ গায়ক দ্বীপেন বৰুৱাই কৈছিল জুবিন গাৰ্গে এটা পুৰণি গীত ভুলকৈ গোৱাৰ প্ৰসংগত। কাৰণ "ডক্তৰ বেজবৰুৱা"ৰ চিৰসেউজ গীতটোত কণ্ঠদান কৰিছিল, ৰমেন বৰুৱাৰ পৰিচালনাৰে। গতিকে কোৱাৰ অধিকাৰ আছে। দ্বীপেন বৰুৱাই কৈছিল, ''শুদ্ধকৈ গীত গাব লাগে...। মই দোষ নিদিওঁ, বেয়া বুলিও নকওঁ, গানত নতুনত্ব আনিব পাৰে, কিন্তু গানৰ কথাৰ কিছুমান শব্দ ভুলকৈ গোৱা হৈছে। সেই কথাই আমাক কষ্ট দিয়ে।'' গায়ক গৰাকীয়ে যি কৈছে, ঠিকেই কৈছে। --এই যে ঠিকেই কৈছে, সেয়া "জুবিন প্ৰেমী"য়ে ভাল পোৱা নাই। আৰু সেইবাবেই দ্বীপেন বৰুৱাক কেন্দ্ৰ কৰি "জুবিন প্ৰেমী"ৰ প্ৰশ্ন-- "Who is Dipen Baruah?" আমি আশা কৰিছিলোঁ, উত্তৰ জুবিনৰ ফালৰ পৰা আহিব (এই মুহুৰ্তলৈ অহা নাই। তাৰিখ: ৯ ডিচেম্বৰ ২০২২, সময়: পুৱা ৮)। এনে বোৰ কাৰণতে জুবিন গাৰ্গ মোৰ অপ্ৰিয় বিষয়।
বহুতৰে বাবে জুবিন গাৰ্গ ভগৱান, সংগীতৰ ভগৱান। ইমানতে শেষ নহয়, একাংশ "জুবিন প্ৰেমী"ৰ মতে জুবিন গাৰ্গৰ স্থান শ্ৰীমন্ত শংকৰদেৱ, ভূপেন হাজৰিকাৰ ওপৰত। (ইয়াৰ বিপৰীতে মাত মাতিব নোৱাৰিব! মাতিলেই বিপদ!) --এনেধৰণৰ কথাই জুবিনক ওপৰত নাৰাখে, তললৈ নমায়। আৰু আমি অনুভৱ কৰিছো, এনে ধৰণৰ তোষামোদ জুবিনৰ অপ্ৰিয় নহয়। এনে দৰে ভৱাৰ যুক্তি, জুবিন গাৰ্গে এনে "তোষামোদ"ৰ বাবে "জুবিন প্ৰেমী" সকলক বাধা দিয়া নাই। একো কোৱা নাই।
--জুবিনৰ গীত মই শুনো। কেইবাটাও গীত মোৰ প্ৰিয়। কিন্তু জুবিনে চিনেমাৰ সংগীত পৰিচালৰ দিশত ৰমেন বৰুৱাক চুব পৰা নাই (জনপ্ৰিয় গীতৰ সংখ্যাৰে)। তেনেদৰে চিনেমাৰ নেপথ্য গায়কৰ দিশত দ্বীপেন বৰুৱাক চুব পৰা নাই। কথাটো "Who is Dipen Baruah?" কোৱা সকলে গমি চোৱা ছোৱা উচিৎ।
--এই কথা আজি অস্পষ্ট হৈ থকা নাই, "জুবিন প্ৰেমী" সকলে, জুবিন কেন্দ্ৰীক সমালোচনা নিবিছাৰে। এই কথা স্পষ্ট হৈছিল জুবিন পৰিচালিত, জুবিন অভিনীত "মিছন চাইনা", "কাঞ্চনজংঘা" চিত্ৰগৃহলৈ অহাৰ সময়ত। অতি সাধাৰণ, কেৱল বজাৰ কেন্দ্ৰীক চিন্তাৰে নিৰ্মাণ কৰা চিনেমা। হিন্দী-দক্ষিণ ভাৰতৰ চিনেমাৰ ছাঁ পৰা চিনেমা। এই চিনেমা দুখন ব্যৱসায়িক দিশত সফল হৈছিল জুবিন গাৰ্গৰ "ইমেজ" আৰু প্ৰচাৰ পৰিশ্ৰম বা কৌশলৰ বাবে। অস্বীকাৰ কৰিব নোৱাৰি, এই সফলতাৰ বাট মুকলি হোৱাত সহায় কৰিছিল, "জুবিন প্ৰেমী" সকলে। আৰু এই সকল "জুবিন প্ৰেমী"ৰ মাজৰে একাংশই দক্ষ চিনেমা পৰিচালক-লেখক জাহ্নু বৰুৱাক "চিনেমা পৰিচালক জুবিন গাৰ্গ"ৰ পাছত স্থান দি সামাজিক মাধ্যমত হৈ-চৈ আৰম্ভ কৰিছিল।
যুক্তিৰ বুনিয়াদত এই কথা স্পষ্ট, সংগীত শিল্পী জুবিন গাৰ্গে অসমৰ সংগীতৰ ক্ষেত্ৰ খনত বিশেষ স্থান দখল কৰিছে। গোৱা গীতৰ সংখ্যাৰে শীৰ্ষ স্থান দখল কৰি লৈছে। কিন্তু চিনেমা পৰিচালক জুবিন গাৰ্গক শীৰ্ষ স্থানত ৰাখিব খোজাটো বাতুলামি মাত্ৰ। আজিৰ তাৰিখত জুবিন গাৰ্গ-- সাধাৰণ পৰ্যায়ৰ পৰিচালকহে। যি সকলে "চিনেমা পৰিচালক জুবিন গাৰ্গ"ক জাহ্নু বৰুৱাৰ সৈতে তুলনা কৰে, সেই সকলে দৰাচলতে "জুবিন প্ৰেমী" নহয়। কাৰণ-- এনে তুলনাই জুবিনৰ ক্ষতি কৰে। তেনেদৰে শ্ৰীমন্ত শংকৰদেৱ, ভূপেন হাজৰিকাৰ সৈতে তুলনা কৰিয়ো জুবিন গাৰ্গৰ ক্ষতি কৰিছে, "জুবিন প্ৰেমী" সকলে। যুক্তি আৰু তথ্যৰ বুনিয়াদত এই কথা স্পষ্ট-- চিনেকৰ্ম, সংগীতকৰ্মৰ দিশত ড°ভূপেন হাজৰিকাতকৈ বহু পিছতহে স্থান, জুবিন গাৰ্গৰ। বক্তা ভূপেন হাজৰিকা, কথাশিল্পী ভূপেন হাজৰিকা, সম্পাদক-সাংবাদিক ভূপেন হাজৰিকাৰ ওচৰত জুবিন গাৰ্গৰ স্থান? (আৰু আছে)
মন্তব্যসমূহ
একটি মন্তব্য পোস্ট করুন